Зеленский офиси Россия билан урушни тугатиш сценарийсини маълум қилди
Украина президенти офиси маслаҳатчиси Михаил Подоляк урушда эҳтимолий мағлубиятдан сўнг Россия назоратсиз сиёсий ўзгаришларга дуч келишини айтиб, уруш тугашини прогноз қилди.
Подолякнинг сўзларига кўра, баъзи ҳудудлар автономия имкониятга эга бўлади.
“Украина Қуролли кучлари Бош штаби томонидан ишлаб чиқилаётган ва Олий Бош қўмондонлик штаб-квартираси йиғилишларида батафсил муҳокама қилинган қарши ҳужум доирасида Россия тўрттагача муҳим мағлубиятга учрайди. Шундан кейин Россия армиясидаги парчаланиш ва якуний деморализация жараёнлари орқага қайтарилмас ҳолга келади”, — дейди у.
Подоляк Россия шаҳарларида катта йўқотишлар туфайли оммавий норозилик намойишлари бошланиши мумкинлигини айтди. Шунингдек, Россия президенти Владимир Путин атрофида “айбдорларни қидириш” бошланиши, бу эса ҳокимият вертикалининг заифлашишига олиб келиши прогноз қилинган.
Михаил Подоляк Украина Қуролли кучлари 1991 йилдаги Украина чегараларида тўхташини, Россияда эса федерациянинг айрим субъектлари ажралиб чиқиши мумкинлигини таъкидлади. Ядро қуролларига келсак, Подолякнинг сўзларига кўра, улар Россия генералларининг қолган вакиллари назорати остида бўлади, шунинг учун уларнинг қора бозорга тушиш хавфи минималдир.
Россия муваққат ҳукумати вакиллари Украина билан Россия армиясининг ҳарбий жиноятлари, Россияни чегара зонасида демилитаризация қилиш, шунингдек, товон тўлаш бўйича музокаралар олиб бориши прогноз қилинмоқда. Подоляк урушни тугатиш бўйича бундай сценарийни тезлаштириш учун Украинага кўпроқ қуроллар кераклигини айтмоқда.
“Формула оддий: агар сиз урушни тезроқ тугатишни истасангиз, Украинага сўрагандан ҳам кўпроқ қурол-яроғлар беринг”, — деб хулоса қилди Зеленский офиси маслаҳатчиси.
