АҚШ президенти Жо Байден Украинага 31 та Abrams танки етказилишини маълум қилди. Бу ҳақда NBC news хабар берди.
Байденнинг сўзларига кўра, етказиб бериш кўп вақт талаб этади, бироқ АҚШ тез орада украиналик ҳарбийларни ўқитишни бошлайди.
“Ушбу танкларни жанг майдонига етказиш вақт талаб қилади. Биз бу вақтдан украиналиклар Abrams танкини мудофаасига қўшишга тўлиқ тайёр бўлиши учун ўқитишда фойдаланамиз”, — деди у.
АҚШ президенти Германияга Leopard танкларини Киевга беришга рози бўлгани учун миннатдорлик билдирди. У бу яна бир бор Украина иттифоқчиларининг бирлигини ва Россиянинг уларни бўлиб ташлашга уринишлари беҳуда эканини кўрсатишини таъкидлади. Abrams танкларини ишлаб чиқариш учун АҚШ 400 миллион доллар харажат қилиши айтилмоқда.
“Танклар Украина учун махсус General Dynamics томонидан ишлаб чиқарилиши сабабли уларни етказиб бериш бир йилдан кўпроққа кечиктирилиши мумкин”, — деб ёзмоқда Америка ОАВлари.
Abrams хусусиятлари
М1 Abrams 1980 йилдан бери АҚШ мудофаасига хизмат қилади. Вашингтон Abramsнинг 2,6 мингдан ортиқ турли модификацияларидан фойдаланади, уларнинг 3,5 мингга яқини захирада сақланмоқда. Шунга ўхшаш танклар Австралиядан Марокашгача бўлган бир қатор мамлакатларда хизмат қилади ва турли шароитларда ўзини яхши исботлаган.
Abrams танклари оғирлиги 70 тоннадан ошади, 1 500 от кучига эга. У 120 мм асосий қурол, М2.50 калибрли пулемёт, 7,62 мм пулемётли М240 билан қуролланган. Abrams жанговар ҳаракатларда илк бор Форс кўрфаси урушида кўриниш берган. Урушда 2 000 дан ортиқ Abrams танклари жанговар бўлинмалар билан бирга жойлаштирилган ва фақат 23 таси шикастланган ёки йўқ қилинган.
Аввалроқ АҚШ расмийлари Оқ уй Abrams’ни Украинага Ғарб ва Россия ўртасидаги зиддиятни кескинлаштиришдан қўрқиб эмас, балки Америка танкларининг ишлаши жуда қийинлиги ва кўп хос ёнилғи талаб қилгани учун жўнатмоқчи эмаслигини билдирганди.
Мавзуга доир:
Изоҳ (0)