Анқара Шимолий Атлантика алянси(НАТО)дан чиқиш эҳтимолини кўриб чиқмаяпти. Бу ҳақда Туркия президенти Ражаб Тоййиб Эрдўғон раислигидаги Адолат ва тараққиёт партияси матбуот котиби Ўмер Челик 25 январь куни маълум қилди.
“Ҳар сайловда бундай ҳолатларга (Туркияни НАТОдан чиқариш чақириқларига — “Дарё” изоҳи) дуч келамиз. Булар бизни хавотирга соладиган нарсалар эмас. Туркияни НАТОдан чиқариш кераклиги ҳақида гапираётганларнинг сўзларида асос йўқ. Бу ҳақда гап бўлиши ҳам мумкинмас. Биз НАТОга асос солган давлатлардан биримиз. Улар бу ҳақда гапиришга ҳақли эмас”, — деди Челик CNN Турк телеканалига берган интервьюсида.
25 январь куни эрталаб Туркиянинг “Ватан” партияси раиси ўринбосари Этҳем Санжак Туркия Анқарага қарши провокацион ҳаракатлар туфайли 5—6 ой ичида НАТОни тарк этиши мумкинлигини айтганди. Унинг сўзларига кўра, сўнгги сўровлар Туркия аҳолисининг камида 80 фоизи “АҚШ Туркияга нисбатан энг душманона ва бузғунчи сиёсат олиб бораётган давлат” эканига ишонч билдирган. Сиёсатчи “сўнгги пайтларда турк халқи Россия ва Владимир Путинга ҳамдард бўла бошлаганини” таъкидлади.
19 январь куни “Ватан” партияси республика ҳукуматини Шимолий Атлантика алянсидан чиқишга чақирувчи “НАТОдан чиқайлик” умуммиллий кампанияси бошланганини эълон қилганди. Ушбу кампания доирасида сиёсий ҳаракат бир қатор шаҳарларда майдонларда тегишли петицияларни имзолаш учун столлар ташкил қилишни, НАТОнинг Туркиядаги базаларига қарши митинг ва норозилик намойишларини ўтказишни режалаштирмоқда. Партия раҳбари Доғу Перинчек “Кучли НАТО Туркия учун кучли таҳдид дегани” деб таъкидлаган.
Изоҳ (0)