Turkiya yarim yildan keyin NATOdan chiqishi mumkin — turkiyalik siyosatchi
NATOning Anqaraga qarshi provokatsion harakatlari tufayli Turkiya besh yoki olti oy ichida alyansdan chiqishi mumkin. Bu haqda Turkiyaning “Vatan” partiyasi raisi o‘rinbosari Ethem Sanchakning nutqiga tayanib, “RIA Novosti” xabar berdi.
“NATO o‘zining provokatsiyalari bilan bizni bu harakatlarga majburlamoqda. Alyans bizni qo‘shni Gretsiyaga qarshi qo‘yishga harakat qilmoqda. Turkiya besh-olti oy ichida NATOdan chiqadi. U bizni Yaqin Sharqdagi voronka ichiga tortmoqchi. Shvetsiya va Niderlandiyada Qur’onga qarshi harakatlarni ko‘ryapsiz, NATOdan chiqish shoshilinch va majburiy holga aylandi”, — dedi u.
Sanchak aholi orasida o‘tkazilgan so‘rovnomalarga tayanib, Turkiya aholisining 80 foizi AQSHni Anqaraga qarshi dushmanlik va buzg‘unchi siyosat olib borayotgan davlat deb bilishini ko‘rsatayotganini aytdi. U Turkiya va Suriya rahbariyati AQSHni Suriya hududini tark etishga majbur qilish uchun muzokara stoliga oʻtirishiga ishonch bildirdi.
”Biz Asad va qo‘shni davlatlar rahbarlari bilan oʻtirib tinchlik shartnomasini imzolaymiz. Terrorchi tashkilotlarni va AQSHni Suriya hududidan zudlik bilan chiqarib yuborishimiz kerak. Suriyaliklar va turklar qardosh xalqlardir. Suriyaliklar arab xalqalari ichida bizga eng yaqinidir. Biz qochqinlarning oʻz mamlakatlariga xavfsiz qaytishini ta’minlashimiz kerak. Asad ularning qaytishiga qarshi bo‘ladi deb oʻylamayman. Suriyani birgalikda tiklay olamiz”, — deya qoʻshimcha qildi u.
Ma’lumot o‘rnida, avvalroq Turkiya prezidenti Rajab Toyyib Erdo‘g‘on Stokgolmda Qur’on yoqib yuborilganiga munosabat bildirib, Shvetsiya endi NATOga a’zolikda qo‘llab-quvvatlanmasligini aytgandi.
