НАТОнинг Анқарага қарши провокацион ҳаракатлари туфайли Туркия беш ёки олти ой ичида алянсдан чиқиши мумкин. Бу ҳақда Туркиянинг “Ватан” партияси раиси ўринбосари Этҳем Санчакнинг нутқига таяниб, “РИА Новости” хабар берди.
“НАТО ўзининг провокациялари билан бизни бу ҳаракатларга мажбурламоқда. Алянс бизни қўшни Грецияга қарши қўйишга ҳаракат қилмоқда. Туркия беш-олти ой ичида НАТОдан чиқади. У бизни Яқин Шарқдаги воронка ичига тортмоқчи. Швеция ва Нидерландияда Қуръонга қарши ҳаракатларни кўряпсиз, НАТОдан чиқиш шошилинч ва мажбурий ҳолга айланди”, — деди у.
Санчак аҳоли орасида ўтказилган сўровномаларга таяниб, Туркия аҳолисининг 80 фоизи АҚШни Анқарага қарши душманлик ва бузғунчи сиёсат олиб бораётган давлат деб билишини кўрсатаётганини айтди. У Туркия ва Сурия раҳбарияти АҚШни Сурия ҳудудини тарк этишга мажбур қилиш учун музокара столига ўтиришига ишонч билдирди.
”Биз Асад ва қўшни давлатлар раҳбарлари билан ўтириб тинчлик шартномасини имзолаймиз. Террорчи ташкилотларни ва АҚШни Сурия ҳудудидан зудлик билан чиқариб юборишимиз керак. Сурияликлар ва турклар қардош халқлардир. Сурияликлар араб халқалари ичида бизга энг яқинидир. Биз қочқинларнинг ўз мамлакатларига хавфсиз қайтишини таъминлашимиз керак. Асад уларнинг қайтишига қарши бўлади деб ўйламайман. Сурияни биргаликда тиклай оламиз”, — дея қўшимча қилди у.
Маълумот ўрнида, аввалроқ Туркия президенти Ражаб Тоййиб Эрдўғон Стокгольмда Қуръон ёқиб юборилганига муносабат билдириб, Швеция энди НАТОга аъзоликда қўллаб-қувватланмаслигини айтганди.
Изоҳ (0)