Дубайда дунёдаги биринчи 3D босма масжид қурилади (видео+фото)

Дубайда дунёдаги биринчи 3D босма масжид қурилади. Бу ҳақда Khaleej Times хабар берди.

«Харажат нуқтаи назаридан, бу анъанавий тарзда масжид қуришдан ўттиз фоизга қиммат туради. Сабаби бу дунёдаги биринчи шундай лойиҳадир. Келажакда 3D кафолати ўттиз йил бўлади», — деди Дубай Исломий ва хайрия ишлари бўлими раҳбари Ал Шайбоний.

Дубайнинг 3D босиб чиқариш стратегияси

Масжидни 3D босиб чиқариш технологиясидан фойдаланган ҳолда қуриш қарори Дубайнинг 2030 йилга бориб етакчи технологик марказга айланиш ниятига мос келади. Дубайнинг 3D босиб чиқариш стратегияси 2016 йилда Дубай ҳукмдори шайх Муҳаммад бин Рашид ал-Мактум томонидан амирликни минтақавий ва глобал технология маркази сифатида тарғиб қилиш мақсадида бошланган ташаббусдир.

Ушбу мақсадга эришиш учун шаҳар ҳокимияти 2030 йилгача барча қурилиш лойиҳаларининг камида 25 фоизини 3D босиб чиқариш технологиясига ўтказишни режалаштирмоқда. Муниципал мутасаддиларнинг ҳисоб-китобларига кўра, бу меҳнат харажатларини 70 фоизга, қурилиш харажатларини эса 90 фоизгача камайтириш имконини беради.

Бу қарор қатор мамлакатларни қурилиш технологиялари ишлаб чиқарувчиларини маҳсулотларини Дубайга жўнатиш ва улардан экспериментал тузилмаларни яратишда фойдаланишга илҳомлантирди.

Масжиднинг умумий конструкциясини қуриш тахминан тўрт ой, биноларни ички безатиш учун эса яна ўн икки ой давом этиши кутилмоқда.

Мавзуга доир: Дубайда дунёдаги энг баланд осмонўпар бино қурилади (видео)