Эрон парламенти спикери Муҳаммад Қолибаф ҳукумат Европа Иттифоқи давлатларининг барча армиясини террорчи ташкилот деб эълон қилишини айтди. Бу ҳақда IRNA хабар берди.
Бунга Европа Иттифоқининг Эрон Ислом инқилоби қўриқчилари корпусини (ИИҚК) террорчи гуруҳ деб белгилаш қарори сабаб бўлган. Эрон мазкур қарорни Исроил илгари сурганини қайд этмоқда. Калибаф Эрон парламентининг навбатдаги сессияси очилиши чоғида шундай баёнот берган. У Европарламентнинг ИИҚКни террорчи деб эълон қилиш қарори Исроилнинг буйруғи билан қабул қилингани ва бу Европанинг жиддий хатоси эканини айтган.
Эронлик сиёсатчи ИИҚК терроризмга қарши урушда, жумладан «АҚШ томонидан қўллаб-қувватланаётган ИШИДни йўқ қилиш»да ғалаба қозонганини айтган. Сиёсатчининг сўзларига кўра, Европа Иттифоқи аллақачон Эронга қарши террорчилик кампаниясини бошлаб юборган ва у оммавий ахборот воситалари орқали олиб борилмоқда.
18 январь, чоршанба куни Европарламент Европа Иттифоқини ИИҚКни террорчи ташкилотлар рўйхатига киритишга чақирди. Европада қўриқчилар корпуси Эрондаги норозилик намойишларини бостиришда ва Украинага қарши урушда рус армиясига дронлар етказиб беришда айбланган.
Эрон парламенти Европа Иттифоқи мамлакатлари армияларини террорчи ташкилот деб тан олиши ҳақида Эрон парламенти президиуми аъзоси Аҳмад Нодирий ҳам маълум қилган.
Эрон парламенти аллақачон қонунга ўзгартириш лойиҳасини тайёрлаб қўйган, у АҚШ ИИҚКни террорчи ташкилот деб эълон қилгани муносабати билан кўрилган чораларга тааллуқлидир ва бу лойиҳа Европа Иттифоқи давлатларининг барча қуролли кучларига тегишли бўлади.
19 январь куни Эрон ташқи ишлар вазири Ҳусайн Абдуллоҳиян Европа Иттифоқининг ташқи ишлар ва хавфсизлик сиёсати бўйича олий вакили Жосеп Боррел билан телефон орқали мулоқоти чоғида Европани ИИҚКни террорчи деб тан олиш қарори «ўз оёғига ўқ узиш» бўлишидан огоҳлантирган. Эрон ташқи ишлар вазири ИИҚК Эрон хавфсизлигини таъминловчи расмий ташкилотлигини қайд этган.
Изоҳ (0)