Россиянинг Ленинград вилояти Малоэ Карлино қишлоғида ўзбекистонлик эркак 13 метрлик баландликдан қулаб ҳалок бўлди. Бу ҳақда 47Channel хабар берди.
Маълум қилинишича, ҳодиса 21 январь куни тушга яқин «Предпортовй» ёпиқ аксионерлик жамияти филиали ҳудудида содир бўлган. Скотч ишлаб чиқарувчи завод қурилишида томни таъмирлаётган эркак томдан қулаб тушган. Унинг хўжайини зудлик билан тез ёрдам чақирган, бироқ воқеа жойига етиб келган шифокорлар ишчи ўлганини аниқлаган.
Ҳуқуқ-тартибот идоралари воқеани бахтсиз ҳодиса деб ҳисобламоқда, бироқ воқеа жойидан хавфсизлик арқони ўрганиш учун олинган.
Аввалроқ Қозоғистоннинг Ақмола вилоятидаги ишламаётган «Бестобе» кони ҳудудида ноқонуний олтин қазиб олувчилар ўзбекистонлик эркакнинг жасадини аниқлаганди. Январь ойида Россиянинг Волхова шаҳрида ўзбекистонлик 20 ёшли йигит плёнка майдалагичга тушиб кетиб, ҳалок бўлган.
Декабрь ойида Россияда ўзбекистонлик қурувчи баландликдан қулаб вафот этган. 12 декабрь куни ҳам Санкт-Петербургда ўзбекистонлик ишчи 7-қаватдан қулаб ҳалок бўлганди.
Изоҳ (0)