Туркманистон Миллий Генгеши (парламенти)нинг 21 январь куни Ашхободда бўлиб ўтган қўшма мажлисида Туркманистон халқ ҳокимияти олий органи – Халқ маслаҳатини ташкил этиш тўғрисида қарор қабул қилинди. Бу ҳақда мамлакат давлат ахборот агентлигига таяниб, «Интерфакс» хабар берди.
Халқ ҳокимияти олий органини Туркманистоннинг собиқ президенти, аввал парламент юқори палатаси раиси бўлган Гурбангули Бердимуҳамедов бошқаради. Бердимуҳамедовга миллий етакчи мақоми ҳам берилди.
Қайд этилишича, йиғилишда Халқ маслаҳатининг парламентда вакиллар палатаси сифатидаги ўрни тугатилиб, парламент яна бир палатали органга айланди. Мамлакат конституциясига ўзгартириш ва қўшимчалар киритиш тўғрисидаги тегишли конституциявий қонун лойиҳасини Туркманистон президенти Сердар Бердимуҳамедов имзолади.
2021 йил январь ойида Туркманистонда қонун чиқарувчи ҳокимият бир палатали парламентдан икки палатали парламентга ўтган эди. Илгари мамлакатнинг ягона ва бир палатали парламенти бўлган Мажлис қуйи палатага, Халқ кенгаши эса юқори палатага айлантирилди.
2022 йил январь ойи ўрталарида эса Гурбангули Бердимуҳамедов мамлакат конституциясига ўзгартиришлар киритиб, Халқ маслаҳатига катта ваколатлар бериш ва бир палатали парламентни қайтариш нияти ҳақида маълум қилди.
Эслатиб ўтамиз, 2022 йил февралда Гурбангули Бердимуҳамедов Туркманистон президенти лавозимини «ёш раҳбар»га топширишини маълум қилган. Бир неча кундан сўнг унинг ўғли Сердар Бердимуҳамедов президентликка номзод сифатида кўрсатилди. У март ойида бўлиб ўтган президентлик сайловларида 72,97 фоиз овоз билан ғалаба қозонди.
Изоҳ (0)