«Толибон» Фавқулодда вазиятлар вазирлиги 10 январдан буён Афғонистонда 104 киши аномал совуқ оқибатида вафот этганини маълум қилди. Бу ҳақда Etilaatroz хабар берди.
Вазирликнинг расмий вакили Шафиуллоҳ Раҳимий мамлакатда совуқдан вафот этганлар статистикасини эълон қилди. Афғонистоннинг 16 та вилоятида 104 киши совуқ ҳаво туфайли юзага келган музлаш ва шамоллашдан вафот этган. Об-ҳаво камида 50 та уйга зарар етказган, 70 минг бош чорва моллари нобуд бўлган.
Норасмий манбалар аномал совуқдан аллақачон 150 дан ортиқ одам ҳалок бўлгани, уларнинг аксарияти вояга етмаганлар эканини таъкидламоқда. Энг кўп қурбонлар ва талофатлар Жузжон, Бадахшон, Сарипул, Фарёб ва Бодғис вилоятларида қайд этилган.
Аввалроқ Бағлон ва Ҳирот вилоятларида аномал совуқ оқибатида 25 киши, жумладан, 24 нафар гиёҳванд ва бир нафар чўпон ҳалок бўлганди. Бундан ташқари мамлакатда саккиз мингга яқин жонивор совуқдан нобуд бўлган. Шунингдек, аномал совуқ қурбонлари 70 кишига етганди.
Изоҳ (0)