Қирғизистон президенти аҳоли учун электр энергияси нархи ошишини эълон қилди

Қирғизистон президенти Садир Жапаров аҳоли учун электр энергияси тарифлари оширилишини эълон қилди. Май ойидан бир киловатт-соат 77 тийиндан 1 сом (0,012 доллар)гача қимматлашади.

Президент энергия секторидаги муаммолар, хусусан, электр ускуналарининг эскиргани, 137 миллиард сом (1,6 миллиард доллар)лик қарз, электр энергияси импортига боғлиқлик ва совуқ ҳаво туфайли юкламалар ҳақида эслатди.

«Гапимнинг охирида халққа мурожаат қилмоқчиман. Юқорида баён этилганларнинг барчасини ҳисобга олиб, шу йилнинг май ойидан биз электр энергияси тарифини 77 тийиндан 1 сомгача кўтарамиз. Агар бундай қилмасак, ўз энергетика тармоғимизни бутунлай йўқотишимиз мумкин. Чунки бизда ишлаб чиқарилаётган электр энергиясининг 21 тийинлик таннархига энергетиклар меҳнатига тўлаш, эскирган трансформаторлар, симлар, симёғочларни алмаштириш учун харажатлар қўшилади, охир-оқибат, 1 киловатт электр энергияси нархи 2 сом 38 тийинга айланади», — деб ёзди президент.

Жапаров энергия секторидаги бундай вазият сабабларини келтириб ўтди. Унинг айтишича, совет даврида электр энергияси мўл-кўл бўлган, у экспорт қилинган. «Бироқ мустқиллик йилларида бирорта ҳам электр станцияси қурилмаган, катта қувватли трансформаторлар ва юқори кучланишли симлар янгиланмаган. Асбоб-ускуналарнинг 80 фоиздан ортиғи эскириб кетган», — деди Қирғизистон президенти.

Шунингдек, аҳолининг бир ярим карра кўпайгани қайд этилди. 1991 йилда 9 миллиард киловатт-соат истеъмол қилинган бўлса, ҳозир 16 миллиардга етган.

Президентнинг айтишича, сўнгги 15 йилдан буён қишда мамлакат қўшни мамлакатлардан 3 миллиард киловатт-соат энергия сотиб олмоқда, у тахминан 5 сомдан тушмоқда.

Қирғизистонда 1 киловатт электр энергияси 0,77 сом туради (кам таъминланган қатлам учун — 0,5 сом). 700 киловатт лимитдан ўтилса, 2,16 сом тўланади (тоғли ва олис ҳудудлар аҳолиси учун лимит йўқ). Шунингдек, ўтган йили лимитсиз тариф киритилган бўлиб, унга кўра, бир киловатт 5,04 сомга тушади.

Аввалроқ Қирғизистон энергетика вазири Таалайбек Ибраев қишки мавсумга тайёрланмагани учун танқид қилинган эди.

Қирғизистон Энергетика вазирлиги мамлакатда вақти-вақти билан электр ўчирилишини маълум қилган. Агар электр энергияси узилмаса, одамлар бир ой давомида электр таъминотисиз қолиши мумкинлиги, чунки қурилмаларни қайта тиклаш зарурлиги айтилган.

12 январь куни Қирғизистонда максимал суткалик электр энергияси истеъмоли қайд этилди. Аҳолидан электр энергиясини тежаш сўралган.