«Дарё» нашри 20 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Туркманистон бизнеси учун очиқ, айни пайтда Путин Қозоғистон президенти билан энергетик ҳамкорликни муҳокама қилмоқда
Россия бош вазири Михаил Мишустин 19 январь куни Туркманистон-Россия форумида қатнашиш учун ишчи ташриф билан Ашхободга келди, деб ёзади «Коммерсантъ».
У икки томонлама ҳамкорликнинг асосий йўналишларини белгилар экан, хусусан, айни пайтда бор-йўғи 1 миллиард долларга баҳоланаётган товар айланмасини кенгайтириш зарурлигини қайд этди.
Мишустин таъкидлашича, Москва ва Ашхобод ўртасидаги ҳамкорликни ривожлантиришда ҳозирги «ностандарт шароитларда» янги имкониятлар мавжуд: Туркманистон бизнеси Россия бозорида у ерни Ғарб компаниялари тарк этганидан кейин «бўшаб қолган» баъзи жойларни эгаллаши мумкин.
Ўз навбатида, Россия Иқтисодиёт вазирлиги маълумотларига кўра, айни пайтда Россия бизнеси Туркманистонда жами 3,5 миллиард долларлик 20 та инвестиция лойиҳаларида қатнашмоқда.
Сўнгги маълумотларга кўра Путин Қозоғистон президенти Қосим Жўмарт Тўқаев билан қўнғироқлашган ва унда энергетика соҳасидаги ҳамкорликни муҳокама қилган.
Украина Ғарбнинг ҳарбий ёрдамига яна қанча вақт умид қилиши мумкин?
АҚШ Марказий разведка бошқармаси раҳбари Уильям Бернс ўтган ҳафта Киевга яширинча ташриф буюрган ва Украина президенти Владимир Зеленский билан учрашган, деб ёзмоқда The Washington Post ўз манбаларига таяниб.
Учрашувда Бернс «Россиянинг яқин ҳафталар ва ойлардаги ҳарбий режалари бўйича» ўз тахминларини Зеленский билан бўлишган.
Нашр маълумотларига кўра, Зеленский ва унинг маъмурияти АҚШ Конгрессининг Вакиллар палатаси республикачилар назоратига ўтгани муносабати билан Украина Ғарбнинг ҳарбий ёрдамига яна қанча вақт умид қилиши мумкинлигидан хавотир билдирган.
Бернс қайсидир нуқтада ёрдам кўрсатиш қийинроқ бўлишини тан олди, дейди нашр манбалари.Аммо разведка бошқармаси раҳбари Зеленский ва унинг ёрдамчиларини АҚШ Украинани қўллаб-қувватлашга содиқ қолгани ва декабрь ойида Конгресс томонидан Киевга маъқулланган 45 миллиард долларлик ёрдам пакети камида июль ёки августгача давом этишига ишонтирган.
Хабарда айтилишича, музокаралар чоғида Бернс «жанг майдонидаги ҳозирги лаҳзанинг муҳимлигини таъкидлаган».
Айни вазиятда АҚШ Украинага янги ёрдам пакетини ажратди, унга Bradley ва Stryker зирҳли машиналари киритилган
Германиянинг Украинага танк етказишда иккиланаётгани унинг тарихи билан боғлиқ
Украина президенти Владимир Зеленский танклар туфайли Германия канцлерини «сиёсий иродасизлик»да айблади
Bloomberg нашрининг Германия вице-канцлери Роберт Хабекка таяниб берган хабарида бу масала қуйидагича очиқланди:Берлин учун Украинага танк етказиб бериш АҚШ ҳам шундай қилган тақдирдагина осонроқ бўлади, бунга сабаб — Германиянинг ўтмиши.
«Бизнинг тарихимизни яхши биласиз, биз муайян сабабларга кўра, бу нарсаларни (ҳарбий техника етказиб беришни) бошқаларга қараганда кўпроқ истамаймиз», — деб тушунтирди Хабек.
Шу билан бирга, Оқ уй Германиянинг позициясида мантиқ кўрмаяпти, чунки немис «Леопард» танклари Украинага Американинг Abrams танкларидан эртароқ етиб бориши мумкин, Украина ҳарбийлари эса уларни қандай бошқаришни тезроқ ўрганади, деди Bloomberg’нинг АҚШ президенти маъмуриятидаги манбалари.
«Улар бизни қийин аҳволга солиб қўйишди», — деди Байден маъмуриятининг юқори мартабали амалдори CNN нашрига. Унинг фикрича, Берлин ўз позициясини ўзгартирадиганга ўхшамаяпти.
Ўзбекистон шахмат тарихида Рустам Қосимжоновни рекордини янгилаган Нодирбек Абдусатторов ўзбек интеллектини дунёга кўрсатмоқда
Ўзбекистонлик гроссмейстер Нодирбек Абдусатторов (2731) Нидерландияда бўлиб ўтаётган Tata Steel Chess 2023 мусобақасида Магнус Карлсенни (2846) мағлубиятга учратди.
Абдусатторов FIDE рейтингидаги очколари сонини 2731 га етказди ва бу борада Ўзбекистон шахмати тарихидаги энг яхши натижани қайд этди. Нодирбек Рустам Қосимжоновнинг (2678) кўрсаткичини янгилади. Қосимжонов 2015 йилда 2715 натижа қайд этганди.
Амалдаги жаҳон чемпиони Магнус Карлсен мазкур мусобақа доирасидаги иккинчи мағлубиятини қабул қилиб олди. Аввалроқ у норвегиялик гроссмейстер Аниш Кумар Гирига ютқазиб қўйганди.
Абдусатторов мусобақада бешта турда 4 очко тўплаган ҳолда пешқадам бўлиб турибди. 20 январь куни 18 ёшли ўзбекистонлик шахматчи 3 очко билан учинчи ўринда бораётган Ҳиндистон вакили Рамешбабу Праггнанадҳага (2684) қарши дона суради.
Изоҳ (0)