Украина президенти Владимир Зеленский Германия канцлери Олаф Шольцни Киевга Leopard 2 танкларини етказиб бериш масаласида АҚШнинг фикрига таянаётгани учун танқид қилди.
Аввалроқ Шольц АҚШ Киевга Abrams танкалрини етказиб берсагина Leopard 2 танкалрини юборишга рухсат беришини айтганди.
«Бундай қилиш, яъни сен қанча қилсанг, мен ҳам шунча қиламан дейиш, Америка нимадир қилса, мен ҳам шундай қиламан дейиш — нотўғри», — деди Зеленский Германиянинг АRD телеканалига берган интервьюсида Шольцнинг гапларини назарда тутиб.
Унинг фикрича, агар бу мавзу бўйича «сиёсий ирода бўлмаса», «баҳона қидириш керак эмас». «Шунчаки ‘йўқ’ дейиш керак, кимдир ҳали тайёр эмаслигини айтиш керак эмас», — дея ўз фикрини баён қилди Зеленский. Шу билан бирга, у шу пайтгача кўрсатилган ёрдам учун Германия канцлерига миннатдорлик билдирди.
Олаф Шольц Украинага танклар етказиб бериш бўйича қарор қабул қилишда АҚШ президенти Жо Байденнинг позициясига таянаётгани ҳақида Politico ўз манбаларига таяниб хабар берганди. Германия ҳукумати Украинага Leopard танкларини юбориш ҳақидаги муҳокамалар тафсилотларини ошкор этишдан расман бош тортмоқда. Bloomberg Германия танкларни етказиб бериш қарори ҳақида шу ҳафта эълон қилишини ёзганди.
Изоҳ (0)