Украинада «Голос» партиясидан сайланган депутат Андрей Осадчук Европа етакчилари Украинада кечаётган катталикдаги урушга тайёрмаслигини айтди. Депутат Sky news’га берган интервьюсида бу ҳақда гапирди.
«Ўнлаб йиллар давомида Европа қитъаси гуллаб-яшнади. Давлат раҳбарлари эса фақат фуқароларга қандай қулайлик яратиш ҳақида ўйлаши керак эди. Натижада, давлат раҳбарлари ҳарбий раҳбар бўлишга мутлақо тайёр эмас», — деди у.
Депутатнинг фикрича, Европа давлатлари раҳбарлари, гарчи урушдан «қўрқса-да», энди четда туролмайди.
«Украинанинг ғалабасидан бошқа йўл йўқлиги аён бўлди. Лекин, афсуски, Украинага ҳарбий ёрдам беришда ҳамон кечикишлар бўлмоқда», — деди депутат.
Шунингдек, Осадчук Зеленскийнинг Украинани ҳарбий қўллаб-қувватлаш, аслида, Европа келажагига сармоя экани, чунки бу европаликларга ўз аскарларини урушдан ҳимоя қилишга имкон беришини айтган сўзларини эслатди. Депутат британиялик журналистлар билан суҳбатда танклар мавзусига ҳам тўхталиб, оғир зирҳли техникасиз Украина ҳужум қилолмаслигини билдирди.
«Буюк Британия 12 ёки 14 та янги танк етказиб беришини эълон қилди, бу, эҳтимол, ўз синфидаги энг яхшиларидан бири бўлади», — деди депутат.
Шу билан бирга, у фронт чизиғи 1 000 километрдан узоқроққа чўзилгани, шунинг учун Украина қуролли кучлари нафақат ўзини ҳимоя қилиши, балки ўз ҳудудларини ҳам озод қилиши кераклигини қайд этди.
Мавзуга доир: АҚШ Миллий разведкаси Украинанинг мағлубияти глобал оқибатларга эга бўлиши ҳақида огоҳлантирди
Изоҳ (0)