Қозоғистон шахмат федерацияси: Олмаотадаги жаҳон чемпионатида ҳижобини ечган эронлик қизни номаълум шахслар қидирди

Қозоғистон шахмат федерацияси эронлик спортчи Сара Хадемнинг Олмаотада бўлиб ўтган жаҳон чемпионати вақтида таъқибга учрагани ҳақида маълумот берди. Бу ҳақда Tengrinews хабар берди.

«Муайян хавфлар мавжуд эди. Турнир директори сифатида ҳамкасбларни йиғиб, вазиятни кўриб чиқишимга тўғри келди. Номаълум шахслардан қўнғироқлар бўлди, жумладан, федерация ходимлари номига ҳам. Улар иштирокчининг яшаш жойи, йўналиши ва бошқа маълумотларни билишга уринди», – деди федерация биринчи вице-президенти Дармен Садвакасов.

У вазият кескинлашиши мумкинлиги сабабли шахматчи хавфсизлигини таъминлаш илтимоси билан Олмаота ҳокимлигига мурожаат қилинганини айтди. Қизни қўриқлаш учун хавфсизлик ходимлари ҳам бўлган.

«Биз унинг мамлакатдан хавфсиз чиқиб кетишини таъминладик: у ўз ватанига эмас, балки Испанияга учиб кетди ва ҳозирда қайтишни режалаштирмаяпти», — деди шахмат федерацияси вице-президенти.

Хадем Олмаота шаҳрида бўлиб ўтган тезкор шахмат ва блиц бўйича жаҳон чемпионатида ҳижобсиз қатнашган. Бу Эроннинг аёллар дресс-коди бўйича қонунларига зиддир. Ҳолат юзасидан Эрон шахмат федерацияси қиздан юз ўгирганини таъкидлаган.