Ўтган йили 148 та мамлакатда озиқ-овқат, ёнилғи нархининг ошиши ва яшашнинг қимматлашиши билан боғлиқ 12,5 мингта норозилик акциялари бўлиб ўтди, уларнинг энг йириклари Ғарбий Европада кузатилди, деб ёзади Politico Вашингтондаги Америка университетига таяниб.
«Дунёда шу пайтгача, асосан энергетик сабабларга кўра, ҳаётнинг қимматлашувига қарши бир йил ичидаги бунчалик кўп намойишлар ҳали ҳеч қачон қайд этилмаган эди», — деди университетнинг ривожланиш сиёсати бўйича мутахассисис Наоми Ҳусайн. Унинг айтишича, илгари норозиликларнинг «ўчоғи» озиқ-овқат бўлган бўлса, энди энергия улкан аҳамият касб этмоқда.
Европада ёнилғи нархи қиш фаслидаги аномал иссиқ об-ҳаво туфайли пасайган бўлса-да, ҳукуматлар қийин вазиятдан чиқиб кета олмади, дея қўшимча қилди тадқиқот муаллифларидан бири Жеффри Халлок. Унинг айтишича, умумий мақсадлардан ташқари, намойишчиларни «ҳукуматга қарши кайфият» ҳам бирлаштириб турибди.
Politico ёзишича, озиқ-овқат ва энергия етишмовчилиги энг кўп Глобал жанубга (яъни иқтисодий жиҳатдан камроқ ривожланган мамлакатларга) зарба берган, бироқ Шимолий ярим шардаги бойроқ мамлакатларда тобора кўпроқ норозилик акциялари юз бермоқда.
Хусусан, газета эслатишича, сентябрда Рим, Неапол ва Миланда намойишлар бўлиб ўтган, уларда Италия аҳолиси электр энергияси бўйича келган ҳисобларини ёқиб юборган эди. Октябрда эса Франциядаги намойишчилар ҳукуматдан яшаш нархининг баландлиги юзасидан чоралар кўришни талаб қилди, ноябрда Испанияда ишчилар маошларни оширишни талаб қилиб чиқди.
Бундан ташқари, ўтган йил кузида Чехияда ҳам бир неча марта норозиликлар бўлиб ўтди, намойишчилар газ нархини пасайтиришни сўради.
Изоҳ (0)