Америкалик тадбиркор, Twitter эгаси Илон Маск ижтимоий тармоқда Давосдаги Жаҳон иқтисодий форумининг «дунёни назорат қилиш»даги роли мавзусида сўровнома ўтказди.
«Жаҳон иқтисодий форуми дунёни назорат қилиши керак», — деб ёзган Маск ҳамда твит остида унинг фикрини маъқуллаш ёки рад этиш учун иккита вариант илова қилган: «ҳа» ёки «йўқ».
The World Economic Forum should control the world
— Elon Musk (@elonmusk) January 18, 2023
Тошкент вақти билан 09:44 га қадар 1,9 миллиондан ортиқ киши сўровномада овоз берган. Кўпчилик бу тезисни қўллаб-қувватламаган (86,5 фоиз), аммо овоз берганларнинг 13,5 фоизи Давосдаги форум «дунёни назорат қилиши керак» деган фикрга қўшилмоқда.
Маск долзарб мавзуларда тез-тез сўровномалар ўтказади. Хусусан, октябрь ойи бошида у Украинадаги урушнинг эҳтимолий якунларини тасвирлаб, Қрим Россиянинг бир қисми бўлиб қолиши ва сентябрь охирида Россияга қўшилган тўрт украин ҳудудида БМТ назорати остида қайта референдумлар ўтказишни таклиф қилган. Ушбу пост Twitter фойдаланувчилари, Украина расмийларининг танқидига сабаб бўлди, шунингдек, тадбиркорга тегишли Tesla акцияларининг пасайишига олиб келди.
Давос форуми 16 январь куни бошланган ва 20 январга қадар давом этади. Ташкилот март ойида Россия билан муносабатларни музлатиб қўйгани сабабли форумда Россия вакиллари иштирок этмаяпти.
Изоҳ (0)