Amerikaning Amazon kompaniyasi dunyoning eng qimmat brendlari reytingida o‘tgan yilgi yetakchi — Apple’ni ortda qoldirib, birinchi o‘rinni egalladi. Bu haqda Britaniyaning Brand Finance konsalting kompaniyasining tadqiqotiga tayanib, “TASS” xabar berdi.
“Amazon’ning brend qiymati 2022-yilda 15 foizga ya’ni 350,3 milliard dollardan 299,3 milliard dollarga tushib ketganiga qaramay, yetakchilikni qo‘lga kiritdi”, — deyiladi hujjatda.
Aniqlik kiritilishicha, “brend kuchi” ko‘rsatkichi qiymatining pasayishi 41,2 milliard dollarni tashkil etgan. Korporatsiya brendi “tashqi omillarning o‘zgarishi” tufayli yana 13,7 milliard dollar yo‘qotgan. Biroq kompaniyaning tijorat ko‘rsatkichi ijobiy bo‘lib chiqdi va 3,9 mlrd dollarga yo‘qotishlarni biroz qopladi.
“COVID-19 dan keyingi davrda iste’molchilar Amerika kompaniyasining mijozlarga xizmat ko‘rsatish darajasini tanqid qilgan”, — deydi Brand Finance ekspertlari.
Bundan tashqari, kompaniya buyurtma qilingan mahsulotlarni yetkazib berish muddatini oshirgan. Bu chakana sotuvchi mijozlarning o‘z xizmatlarini boshqa odamlarga tavsiya etish istagining pasayishiga olib keldi.
Shuningdek, dunyoda koronavirus cheklovlarining olib tashlanishi oflayn xaridlarning mashhurligini tikladi, bu ham Amazon xizmatlariga talabning biroz pasayishiga olib keldi.
Brand Finance tahlilchilari, shuningdek, iPhone seriyali smartfonlari va iOS operatsion tizimida ishlovchi boshqa qurilmalari bilan mashhur bo‘lgan o‘tgan yilgi yetakchi Apple kompaniyasining brend qiymati hisobot davrida 16 foizga, ya’ni 355,1 dan 297,6 milliard dollarga kamayganiga ham aniqlik kiritdi.
Amerika korporatsiyasi Apple reytingda ikkinchi o‘rinni egalladi. Bunga kompaniyaning yetkazib berish zanjiri uzilishi va mehnat bozoridagi taqchillik bilan bog‘liq prognoz qilingan daromadining kamayishi sabab bo‘ldi.
Bu britaniyalik ekspertlarning fikricha, Apple’ning asosiy mahsulotlarini ishlab chiqarish imkoniyatini cheklaydi.
Brand Finance metodologiyasiga ko‘ra, “brend kuchi” kompaniyaning marketing, o‘z kapitali va biznes samaradorligiga investitsiyalarni baholashni o‘z ichiga olgan muvozanatli ko‘rsatkichlar kartasi yordamida hisoblanadi.
Mavzuga doir: Apple qatorasiga o‘ninchi marta yetakchi: Dunyodagi eng qimmat brendlar e’lon qilindi
Izoh (0)