Дунё бойлигининг ярмидан кўпи 81 нафар миллиардерга тўғри келади — Oxfam

Дунё бўйлаб 81 миллиардернинг бойлиги умумий жаҳон бойлигининг ярмидан ошади. Бу Oxfam хайрия ташкилотининг ҳисоботидан маълум бўлди (пдф). 

Ҳисоботга кўра, миллиардерларнинг атиги 1 фоизи дунё бойлигининг 45,6 фоизига эгалик қилади. дунёнинг энг камбағал ярмида эса 0,75 фоиз бойлик тўпланган.

Oxfam халқаро ассоциация бўлиб, 90 та давлатда, хусусан, Буюк Британия, Ирландия, Канада, АҚШ ва Австралияда 17 дан ортиқ ташкилотни ўз ичига олади. 

Ташкилот фаолияти қашшоқликка қарши курашга қаратилган. Бошқа нарсалар қаторида, Oxfam халқаро молия ташкилотини ислоҳ қилиш ва адолатли савдо қоидаларини ўрнатишга интилмоқда.

Ташкилот ҳисоботига кўра, пандемия бошланган 2020 йилдан бери миллиардерларнинг бойлиги кунига 2,7 миллиард долларга ошган. Таҳлилчилар бу ўн йилликни дунёдаги энг бой одамлар учун молиявий бум деб атаган. 

Oxfam маълумотларига кўра, 2020 йилдан бери дунёдаги энг бадавлат 1 фоиз одамлар ўз бойликларини 26 триллион долларга оширган. 

Ташкилотнинг қайд этишича, кўплаб миллиардерларнинг бойлиги, жумладан, озиқ-овқат саноати ва энергетикадан олинган даромадларнинг кескин ошгани ҳисобига кўпайган. 

Маълумотларга кўра, 95 озиқ-овқат ва энергетика корпорацияси 2022 йилга келиб ўз фойдасини икки баравар оширган.

Ҳисобот муаллифлари мултимиллионерлар ва миллиардерлар даромадига 5 фоизгача солиқ жорий этишни таклиф қилмоқда. 

Тадқиқотчиларнинг фикрича, бу йилига 1,7 триллион долларга яқин даромад келтиради. Бу миқдор билан, муаллифларнинг фикрича, 2 миллиард одамни қашшоқликдан қутқариш мумкин. 

Умуман олганда, дунёдаги энг бадавлат кишиларнинг солиққа тортилиши қатор глобал инқирозларнинг олдини олади, дейилади ҳисоботда.