Афғонистоннинг Ғазни, Фарёб, Жузжон ва Бодғис вилоятларида аномал совуқдан 18 киши, жумладан, аёллар ва болалар ҳалок бўлди. Бу ҳақда Hasht-e Subh Daily хабар берди.
Маълум қилинишича, Ғазни муниципалитети беш кишининг жасадини ёқиб юборган, тўрт кишининг жасади эса оиласига берилган. Улар гиёҳванд моддалар қабул қилиб келгани айтилмоқда. Ғазнида 100 минг нафар наркоман борлиги, улардан 25 нафари уйсиз экани қайд этилган.
«Толибон»нинг Жузжон вилояти ахборот ва маданият бўлими аномал совуқ ва иссиқлик таъминоти йўқлиги сабабли икки аёл ва бир бола ҳалок бўлганини таъкидлади. Фарёбдаги манба эса ҳавонинг кескин совиши ортидан бир аёл ва бир бола ҳалок бўлганини маълум қилди. Бодғисдаги маҳаллий манбалар бир эркак ва уч бола аномал совуқ қурбонига айланганини қайд этади.
Аввалроқ Бағлон ва Ҳирот вилоятларида аномал совуқ оқибатида 25 киши, жумладан 24 нафар гиёҳванд ва бир нафар чўпон ҳалок бўлганди. Бундан ташқари мамлакатда саккиз мингга яқин жонивор совуқдан нобуд бўлган.
Изоҳ (0)