Қирғизистон энергетика вазири ўринбосари Мирлан Жакипов мамлакат сўнгги уч кун ичида электр энергияси истеъмоли бўйича рекорд ўрнатганини маълум қилди. Бу ҳақда «Кабар» ахборот агентлиги хабар берди.
«Ўтган сутка давомида 76 миллион киловатт/соат энергия истеъмол қилинди. Охирги бир неча кун ичида кечки соатларда энергия тизими мавжуд қувват доирасида ишламоқда, буни иситиш мавсумида қабул қилиб бўлмайди. Республика бўйлаб энергетиклар ГЭС ва подстанцияларда ускунанинг хавфсиз ишлашини таъминлаш ва фавқулодда вазиятларнинг олдини олиш мақсадида тун-у кун навбатчилик қилмоқда», — дейди у.
Жакипов Қирғизистонда фавқулодда энергия тизимини ўчириб қўйиш бўлмаганини ҳам қўшимча қилди.
Аввалроқ Осиё тараққиёт банки (ОТБ) CAREC (Марказий Осиё Минтақавий Иқтисодий Ҳамкорлиги) «Энергетика истиқболи 2030» ҳисоботида яқин етти йил ичида Марказий Осиёда электр энергиясига талаб 30 фоизга ошиши прогноз қилинганди. Ҳисоботда Марказий Осиё ва Кавказ мамлакатлари, шунингдек, уларга қўшни бўлган Мўғулистон, Покистон ва Хитойга эътибор қаратилган.
Изоҳ (0)