Афғонистоннинг Нимроз, Фараҳ, Бодғиз вилоятларида аномал совуқда тўрт мингга яқин қорамол нобуд бўлди. Бу ҳақда Hasht-e Subh Daily хабар берди.
Нимроз вилоятида аномал совуқ туфайли уч мингдан ортиқ чорва моллари, жумладан, сигир, туя, қўй ва отлар нобуд бўлган. Мазкур ҳолатнинг аксарияти Хашруд туманида кузатилган. «Толибон»нинг Нимроз вилоятидаги қишлоқ хўжалиги департаменти 2 534 бош чорва моллари нобуд бўлганини тасдиқлаган.
Фараҳ вилоятидаги манбалар Балаблоқ ва Фарарод туманларида мингга яқин қорамол совуқ оқибатида нобуд бўлганини айтмоқда. Балаблоқ туманидаги бир қанча оилаларнинг камида 30-40 қорамоли нобуд бўлган. Бодғис вилоятида эса тўрт минг бошдан ортиқ чорва моллари аномал совуқ қурбонига айланган.
Аввалроқ Афғонистоннинг Ҳирот, Бағлон ва Ғазни вилоятларида аномал совуқ туфайли 24 нафар гиёҳванд ва бир нафар чўпон вафот этганди. БМТнинг гуманитар масалаларни мувофиқлаштириш бошқармаси Афғонистонда ҳаво ҳарорати -35 даражагача совиши кутилаётганидан огоҳлантирган. Бошқарма оилаларни пул, ёқилғи, иситиш ускуналари ва иссиқ кийим билан таъминлашни бошлаган.
Изоҳ (0)