Фаластин Соғлиқни сақлаш вазирлиги Исроил кучлари босиб олинган Ғарбий Соҳилдаги Рамаллаҳ шаҳри яқинида фаластинлик эркакни ўлдирганини маълум қилди. Бу ҳақда Al Jazeera хабар берди.
Гувоҳларнинг айтишича, 45 ёшли Аҳмад Каҳла 15 январь куни Сильвад қишлоғи яқинидаги назорат-ўтказиш пунктида исроиллик аскарлар билан жанжаллашиб қолганидан кейин отиб ташланган. Отишма олдидан Исроил полицияси Каҳлага машинадан тушишни буюрган, машина ичида унинг ўғли Қусай ҳам бўлган.
«Исроил кучлари юзимга қалампир гази сепиб, мени машинадан туширди. Бундан кейин нима бўлганини билмайман. Дадам ўлдирилганини амакимдан билдим», — дейди 18 ёшли Қусай.
Исроил ҳарбийларининг таъкидлашича, улар фаластинлик бошқарувида бўлган машинага тўхташни буюрган. Полиция қочишга уринган йўловчилардан бирини қўлга олишга уринганидан кейин тўқнашув содир бўлган. Фаластин Ташқи ишлар вазирлиги Каҳланинг ўлдирилишини қоралаб, буни «жирканч қатл» деб атаган.
Исроилликлар томонидан ўлдирилган фаластинликлар сони 2023 йил бошида 13 нафарга етди. 2021 йили босиб олинган Ғарбий Соҳил ва Шарқий Қуддусда 170 дан ортиқ фаластинлик ўлдирилган. Бирлашган Миллатлар Ташкилоти буни Ғарбий Соҳилда 2006 йилдан бери энг кўп ҳалокатли йил деб атади.
Мавзуга доир:
Изоҳ (0)