Сурия ташқи ишлар вазири Файсал Мекдад Туркия қўшинлари Суриядан олиб чиқилмагунча Анқара билан дипломатик яқинлашишнинг иложи йўқлигини маълум қилди. Бу ҳақда у эронлик ҳамкасби Амир Абдуллахон билан учрашувдан сўнг айтди, деб хабар беради Reuters.
«Биз оккупацияни олиб ташламасдан туриб, Туркия билан нормал муносабатларни тиклаш ҳақида гапира олмаймиз», — деди дипломат. Бундан ташқари, Сурия мухолиф гуруҳларни қўллаб-қувватлашни тўхтатишни талаб қилмоқда, деб ёзади агентлик.
Мекдод Сурия президенти Башар ал-Ассаднинг Туркия раҳбарияти билан музокаралари «низо сабабларини бартараф этишга» боғлиқлигини қўшимча қилди. Абдуллахон, ўз навбатида, Эрон Дамашқ ва Анқара ўртасидаги музокаралар жараёнидан мамнун эканини айтди.
Аввалроқ Туркиянинг Hurriyet газетаси Россия, Туркия ва Сурия ташқи ишлар вазирлари 14—16 январь кунлари Москвада учрашиши мумкинлиги ҳақида хабар берганди. Таъкидланишича, ташқи ишлар вазирлари музокараларда Суриядаги вазият, Сурия шимолидаги воқеалар, террор ташкилотларига қарши кураш, шунингдек, қочқинларнинг Туркияга қайтиши каби муҳим мавзуларга тўхталади.
Изоҳ (0)