Россия президентининг собиқ маслаҳатчиси ва иқтисодчи Андрей Илларионов 13 январь куни блогер Александр Шелестга берган интервьюсида Россия бутун Украинани қамраб оладиган янги ҳужумни бошлашни режалаштираётганини айтди.
Унинг сўзларига кўра, Кремль бунга 4 ойдан бери тайёргарлик кўрган. Илларионов 15 январдан бошлаб Кремль Украинага ҳужум режаларини амалга оширишни бошлаши мумкинлигидан огоҳлантирган. У шу куни Москва қўшимча сафарбарлик эълон қилиши мумкинлигини таъкидлаган. Қўшинлар гуруҳини миллион кишига етказиш прогноз қилинмоқда.
«Катта уруш»га тайёргарлик белгилари
Илларионов 17 сентябрдан бошлаб Россия армияси янги, каттароқ ҳарбий ҳаракатларга тайёргарлик бошлаганини айтди. Россиянинг катта ҳужумга тайёрланаётганига далиллардан бири бу қуролли кучлардаги йўқотишлар сонига боғлиқ. Сўнгги 3-4 ой ичида уларнинг сони сезиларли даражада ошган. Шунингдек, 300 мингдан ортиқ одам сафарбар этилган.
Россия қўшинларининг ҳозирги гуруҳи 600-700 минг кишини ташкил этади ва армия илгари ишлатилмаган янги турдаги қуроллардан фойдаланади. Сиёсатчи улар қаторида Атлантика ва Ҳинд океани, шунингдек, Ўрта Ер денгизи орқали ўтадиган «Адмирал Горшков» кемасидаги «Циркон» гипертовушли ракеталарини назарда тутган.
15 декабрь куни Владимир Путин йиғилиш ўтказиб, унда гўёки «катта уруш» ҳақида қарор қабул қилгани айтилади.
«Путин ва Россия раҳбариятининг юқори раҳбари, Россия Бош штаби 24 соат, тинимсиз ишламоқда. Путин ҳар куни ҳарбийлар билан учрашади», — дейди Россия президенти собиқ маслаҳатчиси.
Илларионовнинг сўзларига кўра, Путин Украинага ҳужум учун қуйидаги соҳаларда янги ўринбосарлар тайинлайди:
- Генерал Сергей Суровикин — Донбассда;
- Генерал Олег Салюков — Беларусь томондан;
- Генерал-полковник Алексей Ким — Қрим—Запорожье йўналишидан.
Илларионовнинг таъкидлашича, Путин Украинага Беларусь ҳудудидан Львовгача Ғарб қуролларини етказиб бериш линияларини узиб қўйиш учун ҳужум қилмоқчи. Бу асосий зарба йўналиши бўлади.
«Россия бош штабдаги операция ‘катта Сталинград’ деб номланади. Украина қўшинларининг қуршовга олиниши кутилмоқда. Аммо ҳозирда операция бошқа йўналишда бўлади. Қамал қилиш Украинанинг энг ғарбий чегаралари бўйлаб амалга ошиши режалаштирилган», — дейди Илларионов.
Киев асосий нишон бўлмайди
«Киевга ҳужум қилиш мумкин, аммо, назаримда, бу чалғитувчи характерга эга бўлади», — деди Илларионов. Кенг кўламли уруш бошланишидаги воқеалар пойтахтни кучли гуруҳ эгаллаб ололмаслигини кўрсатган. Нега Ғарб разведкаси бундай йирик ҳужум ҳақида ҳеч нарса билдирмаяпти, деган саволга Илларионов улар бу ҳақда билмаслигини ёки «қўрқитмаслик учун» жим туришини айтди.
Андрей Илларионов ким?
Андрей Илларионов россиялик иқтисодчи ва сиёсатчи. 2000 йилдан 2005 йилгача у Владимир Путиннинг иқтисодиёт бўйича маслаҳатчиси бўлган. У Россия президентининг бир қатор қарорларига рози бўлмагани учун истеъфога чиққан. 2005 йилдан кейин Илларионов Путинга мухолифатчи сиёсатчига айланган. 2014 йилда, Россия босқинининг бошланишидан сал олдин, у Қрим ва Украина шарқини аннексия қилиш режалари ҳақида огоҳлантирган. 2021 йилда у Ғарб Москва томонига ўтганини айтиб, АҚШ президенти Жо Байден ва Путин ўртасидаги музокараларни «Мюнхен келишуви» билан солиштирган. Бунинг учун у бир қатор журналистлар томонидан танқид қилинган.
Изоҳ (0)