«Рус сидяшая» жамғармаси раҳбари, журналист Олга Романова «Вагнер» гуруҳига Россия қамоқхоналаридаги Ўзбекистон, Қирғизистон, Озарбайжон ва Африка маҳбуслари ёлланаётгани ҳақида маълумот берди.
Маълум қилинишича, Украинадаги урушга хорижий фуқароларни ёллаш ноқонуний ҳисобланади. «Россиядаги хорижий фуқароларнинг ҳуқуқий ҳолати тўғрисида»ги Федерал қонунига биноан, чет эл фуқаролари ҳарбий хизматга чақирилиши мумкин эмас.
«‘Вагнер’ амалга ошираётган ҳамма нарса ноқонуний, шунинг учун уларга ноқонунийлик даражаси аҳамиятсиз. Ҳа, урушга чет эллик маҳбуслар ёлланмоқда ва улар ўлмоқда. Биз Тожикистон ва Ўзбекистон фуқароларини суддан ташқари қатл қилиш ҳолатларини ҳам биламиз», — деган Романова.
Аввалроқ АҚШ «Вагнер» гуруҳи Украинадаги урушга 40 000 маҳбус юборганини маълум қилганди. «Вагнерчилар»нинг 90 фоизи маҳбуслардан иборат экани қайд этилган. Январь ойида Луганск вилоятида «Вагнер» хусусий ҳарбий компанияси ўқув марказидан олти маҳбус қочиб кетган, улар орасида Ўзбекистон, Беларусь ва Қирғизистон фуқаролари ҳам бўлган. Ёлланма жангчилар жанговар ҳаракатлар зонасига кетиши керак бўлган пайтда қочиб кетган.
Бундан ташқари «Вагнер» чеченистонлик маҳбусларни ҳам Украинага қарши урушга жалб қилишни бошлаган. Россияда аёл маҳбуслар ҳам урушга ёлланган. Украина қуролли кучлари Россия урушдаги йўқотишларини Ўзбекистон ва Тожикистондан келган меҳнат муҳожирлари ҳисобига тўлдираётганини қайд этган.
Мавзуга доир: Россиядаги колонияда жазо ўтаётган ўзбекистонликлар «Вагнер» гуруҳи таркибида Украинадаги урушга жўнатилган — «Новая газета»
Изоҳ (0)