Россияда «Вагнер» таркибида жанг қилган маҳбусга аталган биринчи ёдгорлик очилди

2022 йил охирида Россиянинг Саратов шаҳридаги мактаблардан бирига Росгвардия собиқ жангчиси, Чеченистондаги уруш фахрийси, Россиянинг Украинадаги истилоси чоғида ҳалок бўлган Денис Ковирзинга аталган ёдгорлик тахтаси ўрнатилган, деб ёзади BBC.

Ковирзин 2016 йилда «тожик миллатига мансуб шахслар» билан зиддиятда одам ўлдирганлик учун етти ярим йилга қатъий режимдаги колонияга ҳукм қилинган эди. У муддатидан олдин шартли озод этилиш учун бир неча марта ариза берган. Сўнгги марта у 2022 йил майида рад жавоби олган.

2022 йил июлида Ковирзин жазо ўтаётган Нижегород ахлоқ тузатиш колониясига «Вагнер» гуруҳи ёлловчилари келган, шу тариқа, у фронтга бориб қолган ва август бошида ҳалок бўлган. Унинг таниши Ольга Подколзина маълум қилишича, у вафотидан кейин жангда кўрсатган жасорати учун мукофот олган.

«Вагнер» асосочиси маҳбусларни ёллаш чоғида ваъда берганидек, Ковирзин президент томонидан афв этилган-этилмагани номаълум.

Ковирзинга бағишланган ёдгорлик тахтаси «Вагнер» таркибида жанг қилган маҳбусга атаб Россияда ҳукумат томонидан расман ўрнатилган биринчи ёдгорликка айланди, деб қайд эртади нашр.

Тахта ўрнатилган мактаб маъмурияти нашр саволларига жавоб беришдан бош тортди. Саратов мери матбуот котиби Анастасия Усова ёдгорлик тахтаси ҳақида биринчи марта эшитаётганини айтди. У «эсанкираб» қолганини айтди ва вазиятга аниқлик киритишга ваъда берди.

Аввалроқ «Вагнер» хусусий ҳарбий компанияси таркибида Украинада жанг қилган маҳбусларнинг биринчи гуруҳи ярим йиллик шартнома тугаганидан кейин афв этилгани хабар берилган эди. BBC маълумотларига кўра, бу гуруҳда қотиллик, талончилик, уюшган жиноий гуруҳ ташкил қилганлик ва амфетаминлар ишлаб чиқарганлик бўйича судланганлар бўлган.

14 январга ўтар кечаси «Вагнер» гуруҳида хизмат ўтаган юздан ортиқ собиқ маҳбуслар ҳарбий операция зонасидан қайтиб келди.

Кремль «Вагнер» жангчиларининг афв этилганини рад этмади, тасдиқламади ҳам. Россия президенти қошидаги инсон ҳуқуқлари бўйича кенгаш аъзоси Ева Меркачева махсус операцияда қатнашган маҳбуслар колониядан чиқарилишидан аввал афв этилганини айтди. Унинг сўзларига кўра, озод этиш ҳақидаги фармонлар махфийлаштирилган, чунки улар давлат сиридан иборат маълумотлар ҳисобланади.

Эслатиб ўтамиз, январь бошроғида Россия президенти Владимир Путин Украинага қарши урушда қатнашгани учун «Вагнер» гуруҳи жангариси Айк Гаспарянни «Жасорат учун» медали билан тақдирлади.