Транспорт вазирлиги Қозоғистонда ноқулай об-ҳаво сабаб автобусдан эвакуация қилинган ўзбекистонлик йўловчилар ҳақида маълумот берди

Қозоғистонда ноқулай об-ҳаво туфайли йўлда қолиб кетган икки автобусдан 70 га яқин ўзбекистонлик эвакуация қилинганди. Ўзбекистон Транспорт вазирлиги уларнинг аҳволи ҳақида маълумот берди.

Вазирлик ахборотига кўра, 9 январь куни соат 18:00 да Uzautotrans service МЧЖнинг Yutong Bus ZK6122h9 русумли автобуси барча талабларга риоя этган ҳолда транспорт воситаси техник, ҳайдовчилар эса тиббий кўрик ва махсус йўриқномалардан ўтиб, Тошкент—Москва йўналиши бўйича 26 нафар йўловчи билан «Тошкент» автовокзалидан белгиланган жадвал асосида қатновни амалга ошириш учун йўлга чиққан.

Йўналиш давомида 10 январь куни Тошкент вақти билан соат тахминан 22:00 да Қозоғистоннинг Ақтўбе вилояти Самара—Чимкент трассасида Фавқулодда вазиятлар вазирлиги томонидан ноқулай об-ҳаво шароити туфайли йўлларда вужудга келган музламалар сабаб шу йўналишда ҳаракатланаётган барча енгил, юк ва жамоат транспорт воситалари ҳаракати вақтинча тўхтатилган.

Шу жумладан, ўзбекистонликлар бўлган автобус ҳаракати ҳам вақтинчалик тўхтатилган. Маҳаллий ҳукуматнинг ФВВ департаменти томонидан йўловчилар ўша атрофдаги масжидга вақтинчалик жойлаштирилган.

Йўлдаги музлар ва тўсиқлар бартараф этилгандан сўнг транспорт воситалари ўз ҳаракатларини давом эттирган.

«Ҳозирда Uzautotrans service МЧЖнинг Тошкент—Москва йўналишида қатновни амалга ошираётган автобус Қозоғистон ва Россия чегара божхона постидан ўтмоқда. Ҳайдовчи билан ўрнатилган оператив алоқага кўра, автобусдаги барча йўловчилар соғ-саломат ҳолда йўналишда ўз сафарини давом эттирмоқда», — дейилади хабарда.