Фарғонада бировнинг давлат рақам белгисидан фойдаланиб, 44 миллион сўмлик жаримага тушган ҳайдовчи аниқланди

Фарғона вилоятида ўзига тегишли бўлмаган давлат рақам белгиларидан ноқонуний фойдаланиб, қоидабузарликлар учун жарималарни тўламай юрган ҳайдовчилар аниқланди. Бу ҳақда вилоят Йўл ҳаракати хавфсизлиги бошқармаси хабар қилди.

Қайд этилишича, 40 P 794 JА давлат рақами аслида ЗАЗ-968 автомобилига тегишли. Лекин давлат рақамидан бошқа бир фуқаро фойдаланиб келган. У йўлларда содир этган қоидабузарликлар жаримаси эса ЗАЗ ҳайдовчисига юборилган.

Олиб борилган қидирув-суриштирув ишлари натижасида ушбу қоидабузарликни содир этган фуқаро аниқланган. Ж.К. исмли ҳайдовчи ушбу рақам белгисидан мақсадсиз фойдаланиб келган ва унинг ҳисобига 8 та қоидабузарлик ёзилган.

Шунингдек, бошқа бир ҳолатда ВАЗ-2101 автомобилига тегишли бўлган 40 D 210 КА давлат рақами белгиси ноқонуний равишда Cobalt автомобилига қўйилгани аниқланган. Бунинг ортидан 44 миллион сўмлик жарималар қайд этилган. Суриштирувлар давомида давлат рақами белгиси далилий ашё сифатида олинган.