Пентагон вакили Патрик Райдер брифинг чоғида маълум қилишича, идора Беларуснинг Украинадаги низога аралашиш ниятида эканидан дарак берувчи белгиларни кўрмаяпти. Россия ва Беларусь қуролли кучлари 16 январдан 1 февралга қадар қўшма парвоз-тактик машғулотларни ўтказишни режалаштирмоқда.
«Россия ва Беларусь қўшма ўқув машқларини ўтказмоқчи эканини биламиз. Биз Беларусь низога қўшилиш ниятида эканини билдирувчи белгиларни кўрмаяпмиз», — деди Патрик Райдер.
19 декабрь куни Россия ва Беларусь президентлари Владимир Путин ва Александр Лукашенко Минксда Иттифоқ давлати хавфсизлигини таъминлаш чораларини муҳокама қилди. Хусусан, Беларусь Ҳарбий-ҳаво кучлари самолётлари ядровий қисмларга эга ўқ-дориларни қўллаш учун модификация қилиниши айтилди. Россия Ташқи ишлар вазирлиги аниқлик киритишича, бундай чоралар НАТО ядро миссиялари ривожлантирилишига қарши мажбурий жавоб бўлган.
Россия ва Беларусь Иттифоқ давлати 2000 йил январидан буён мавжуд бўлиб келмоқда. Иттифоқ иштирокчилари умумий парламент ва конституция, ягона валюта яратишни муҳокама қилган, аммо бундай битимни қабул қилмаган. 2019 йилда Россия ташаббуси билан музокаралар қайта бошланди, 2021 йилда эса томонлар Россия ва Беларуснинг интеграциялашувига қаратилган 28 та иттифоқ дастурларни келишиб олди.
10 октябрь куни Беларусь президенти Александр Лукашенко россиялик ҳамкасби Владимир Путин билан «Иттифоқ давлати ғарбий чегараларидаги кескинлик сабабли» минтақавий қўшинлар гуруҳини кучайтириш ҳақида келишиб олганини маълум қилди.
15 октябрь куни эса минтақавий қўшин гуруҳларининг россиялик ҳарбийлардан иборат дастлабки эшелонлари Беларусга етиб келди. Кейинроқ эса тўққиз мингга яқин Россия ҳарбийлари қўшма қўшинлар гуруҳини жойлаштириш доирасида Беларусга етиб келиши маълум қилинди.
Айни пайтда эса Россия ва Беларусь минтақавий қўшинлар гуруҳини кучайтиришда давом этмоқда, Беларусга Россиядан янги кучлар ва ҳарбий техника етиб келмоқда.
Мавзуга доир:
Изоҳ (0)