Австралиянинг Аделаида ботаника боғида Титум Арум номли дунёдаги энг ёқимсиз ифорли гул очилди. Бу ҳақда The Guardian хабар берди.
Гулнинг ифорига қарамай минглаб сайёҳлар уни кўриш учун навбатда турган. Титум Арум уруғидан 10 йил давомида ўсиб, гуллаганида ўзидан ёқимсиз ифор чиқаради. Шундан сўнг у ҳар уч-беш йилда бир марта гуллайди. Ҳид гулни чанглатиш учун чивинларни жалб қилишга мўлжалланган.
Ботаника боғи ходимларининг сўзларига кўра, гул 8 январь, якшанба куни маҳаллий вақт билан соат 14:00 да очила бошлаган ва соат 17:00 га келиб тўлиқ очилган. Боғ ходими Мэтт Коултер гуллашнинг дастлабки 24 соатида гул ҳиди чўққига чиқиши, 48 соат ичида эса йўқолишини айтди.
«Гул очилишининг биринчи кунида уни кўриш учун бир ярим мингдан ортиқ одам келди, шу учун боғ ўз ишини кечгача давом эттирди. Табиат мўъжизасини кўриш учун ташриф буюрувчилар соатлаб навбатда турди, улардан ўзлари билан сув ва қуёшдан ҳимояловчи воситалар олиб келиш сўралди. Бу аслида жуда гўзал ўсимлик. У фақат икки кун ўзидан ёқимсиз ҳид чиқаради. Бу асосан 24 дан 48 соатгача давом этади», — деди Коултер.
У ўсимликнинг ҳиди узоқдан ҳам сезилишини айтиб, гул ифорини ўлик каламуш ёки чириган пишлоқ ҳидига ўхшатиш мумкинлигини айтди.
«Кўпчилик ундан ўлик балиқ ҳиди келади деб ўйлайди, у ҳақиқатан ҳам мураккаб ифорга эга. Бу жуда қизиқ», — дея қўшимча қилди ботаника ходими ва бу гулнинг дунё бўйлаб мингта намунаси борлигини айтди.
Мавзуга доир: Қирғизистонда лоланинг фанга номаълум тури аниқланди (фото)
Изоҳ (0)