KFOR rahbariyati (Kosovo Force — NATO boshchiligida Kosovoda barqarorlikni ta’minlash uchun mas’ul bo‘lgan xalqaro kuchlar) Serbiya hukumatining qisman tan olingan respublikaga Serbiya xavfsizlik kuchlarini kiritish haqidagi iltimosini rad etdi. Bu haqda Serbiya prezidenti Aleksandr Vuchich Pink serb telekanali efirida ma’lum qildi.
“Ular Serbiya armiyasini Kosovo hududiga qaytarishga zarurat yo‘q, deb hisoblaymiz degan mazmunda javob berishdi”, — ta’kidladi Vuchich. Uning so‘zlariga ko‘ra, KFOR BMT Xavfsizlik Kengashining 1999-yilda qabul qilingan rezolyutsiyasiga muvofiq Kosovoda xavfsizlikni saqlashga o‘zlari mas’ul ekaniga ishora qilgan.
Vuchich KFOR’dan rad javobi Rojdestvo arafasida olinganini alohida ta’kidladi. Serbiya prezidenti bunday paytda rad javobi berishni nomaqbul deb atadi.
Qisman tan olingan Kosovoda Rojdestvo arafasida ikki yosh serbga qilingan hujumni eslatar ekan, Vuchich KFOR xodimlari o‘z ishini professional darajada bajarmayotganini aytib, ularni G‘arb qo‘lidagi vositalar deb atadi.
Dekabr oyida Serbiya KFOR missiyasi qo‘mondonligiga Kosovo va Metoxiyaga serb armiyasidan cheklangan kontingentni yuborishga ruxsat so‘rab murojaat qilgandi.
Serbiya rasmiylari BMT Xavfsizlik kengashining 1244-rezolyutsiyasi 4-bandida nazarda tutilganidek, Kosovo va Metoxiya hududiga ming nafargacha xavfsizlik kuchlarini qaytarmoqchiligini ta’kidlagan.
BMT Xavfsizlik kengashining 1244-rezolyutsiyasi 1999-yil iyun oyida qabul qilingan. U Yugoslaviya federativ respublikasida xalqaro fuqarolik va harbiy ishtirokni taqiqlagan hamda Kosovoda BMTning Muvaqqat ma’muriy missiyasini tuzgan. 4-bandda “Yugoslaviya va Serbiyaning kelishilgan sondagi harbiy xizmatchilariga o‘z vazifalarini bajarish uchun Kosovoga qaytishga ruxsat berilgan”i aytiladi
Izoh (0)