Хитойнинг Шэньчжэнь шаҳри ва махсус маъмурий ҳудуд мақомига эга Гонконг ўртасидаги чегарада назорат-ўтказиш пунктлари 8 январдан одатдагидек иш бошлади, деб хабар бермоқда Sinxua агентлиги. Назорат пунктларининг очилиши 2020 йилда COVID-19 авж олгандан сўнг Гонконг ва Хитойнинг материк қисми ўртасида жорий этилган ҳаракатланиш чекловларини олиб ташлаш йўлидаги биринчи қадам бўлди.
Биринчи босқичда кунига 60 минг Гонконг аҳолиси Хитойга кириши мумкин бўлади. Улардан 50 минг нафари Шэньчжэнь билан чегарада қуруқликдаги назорат-ўтказиш пунктларидан фойдалана олади, қолганлари эса паром, самолётлар ёки Гонконг—Чжухай—Макао кўприги орқали «материк»ка ўтади.
Ўтказиш пунктининг очилишида иштирок этган Гонконг маъмурияти раҳбари ҳаммаси яхши ўтганини айтиб, расмийлар Гонконг ва «материк» ўртасидаги нормал қатновни тўлиқ тиклаш учун умумий режа ишлаб чиқиш ниятида эканини маълум қилди.
Гонконгда ўтган сутка давомида маҳаллий ҳокимият маълумотларига кўра, 15,3 мингдан ортиқ одамда COVID-19 аниқланган, беморлар инфекцияни минтақа ичида ва ташқарисида юқтирган. Шу куни Гонконгда COVID-19 билан касалланганларнинг 72 нафари вафот этган.
Хитойда эса (Гонконг ва Макаодан ташқари) 6 январь куни 10,6 мингдан ортиқ одамда COVID-19 инфекцияси аниқланган, уч киши вафот этган.
Изоҳ (0)