Россия президенти Владимир Путин Украинага қарши урушда қатнашгани учун «Вагнер» гуруҳи жангариси Айк Гаспарянни «Жасорат учун» медали билан тақдирлади.
Маълум қилинишича, Айк Гаспарян 2020 йилнинг ноябрида Россияда қуролли талончиликда айбланиб, қаттиқ режимдаги колонияга 7 йил-у 3 ойга жазо ўташ учун ҳукм қилинган. У қурол-яроғдан фойдаланган ҳолда бир гуруҳ шахслар таркибида талончилик содир этганликда айбдор деб топилган.
2019 йилнинг 12 октябрь куни Гаспарян шериги билан биргаликда Москвада хорижда пул конвертацияси билан шуғулланаётган шахсга нисбатан ўғрилик содир этган. Улар 300 минг рубль (тахминан 4 минг доллар) ўғирламоқчи бўлган. Бунинг учун Гаспарян қалампир газидан фойдаланган, шериги эса травматик тўппончадан эркакнинг бошига ўқ узган.
Гаспарян жазони Рязань колониясида ўтаган. Янги йил арафасида Владимир Путин Жанубий ҳарбий округи қароргоҳига ташриф буюрган ва у ерда Украина ҳудудидаги урушда қатнашган россиялик ҳарбийларга мукофотларни топширган. Бошқалар қаторида Гаспарян ҳам медал олган. У мукофотни Россия президенти қўлидан қабул қилиб, «Россия ва ‘Вагнер’га хизмат қиламан» дея таъкидлаган.
Маълумот ўрнида, «Вагнер» чеченистонлик маҳбусларни Украинага қарши урушга жалб қилмоқда. Украина Мудофаа вазирлиги уларнинг аксарияти сиёсий маҳбуслар эканини маълум қилган. «Вагнер» хусусий ҳарбий компанияси раҳбари Евгений Пригожин аёл маҳбусларни ҳам Украинадаги урушга ёллашни қўллаб-қувватлаганди.
Мавзуга доир: «Вагнер» гуруҳи Украинадаги урушга 40 000 маҳбус юборгани маълум қилинди
Изоҳ (0)