Putin hozir safarbarlikning ikkinchi to‘lqiniga zarurat yo‘qligini aytdi

Rossiya prezidenti Vladimir Putin Rossiyada yaqin orada safarbarlikning ikkinchi to‘lqini boshlanishi mumkinligini rad etmoqda. Bunday bayonotni u Inson huquqlari bo‘yicha kengash a’zolari bilan uchrashuvda e’lon qildi.

“Qandaydir qo‘shimcha safarbarlik tadbirlari haqidagi gaplar shunchaki ma’noga ega emas, bugungi kunda davlat va Mudofaa vazirligi uchun bunga hech qanday zarurat yo‘q”, — dedi Putin.

Rossiya prezidenti qayd etishicha, hatto birinchi to‘lqinda armiyaga chaqirilganlarning hammasi ham haligacha frontga yetib borgani yo‘q: Putinning so‘zlariga ko‘ra, safarbar etilgan 300 ming kishining 150 ming nafarigina “maxsus harbiy operatsiya” zonasida bo‘lib turibdi.

Shu bilan birga, Putin “maxsus harbiy operatsiya uzoq davom etadigan jarayon bo‘lishi mumkinligi” haqida fikr bildirdi.

Rossiya hukumati noyabr boshidan buyon mamlakatda safarbarlik yakunlanganini da’vo qilib kelmoqda. Shu bilan birga, Kreml tegishli prezident farmonini chiqarish haqidagi so‘rovlarni rad etib, bunday hujjat kerak emasligini ta’kidlamoqda. Mustaqil yuristlar qayd etishicha, farmon imzolanmagunicha, safarbarlik tadbirlari istalgan vaqtda davom ettirilishi mumkin.

Safarbarlik bo‘yicha ommaviy kampaniya noyabr boshida yakunlanganiga qaramay, Rossiyaning turli hududlaridan harbiy komissariatlar odamlarga chaqiruv qog‘ozlari yuborib, ularni urushga olib ketayotgani haqida muntazam ravishda xabarlar kelib tushmoqda.

Avvalroq Putin moskvalik deputatlar iltimosiga qaramay, safarbarlikning yakunlanishi haqida farmon imzolamoqchi emasligi haqida uning matbuot kotibi Dmitriy Peskov ma’lum qilgan edi.

Shuningdek, Peskov safarbarlikning ikkinchi to‘lqini boshlanishi mumkinligi haqidagi xabarlarga e’tibor qaratmaslikka chaqirib, “mudofaa vazirligi va prezidentdan kelib tushayotgan axborotga urg‘u berish”ni taklif qildi. U bunday xabarlarni “provokatsion” deb atadi.