Беларусь президенти Александр Лукашенко 6 январь куни Украина ва Польша билан чегарадош Брест вилоятидаги Обуз-Лесновский полигонига ташриф буюрди. Бу ҳақда президенти матбуот хизмати хабар берди.
Россия бўлинмаларидан бири ушбу полигонда жойлашган. «Лукашенко полигонда Россия қуролли кучлари ҳарбий қисмлари ва бўлинмаларининг жойлашуви билан танишди, аскарлар ва офицерлар билан суҳбатлашди», — дейилади хабарда.
Лукашенко, шунингдек, россиялик офицернинг Россия—Беларусь кучлари бўлинмалари ҳақидаги ҳисоботини тинглади.
«Биз умумий иш қиляпмиз. Ҳозирги босқичда Россия қуролли кучлари бўлинмалари белгиланган вазифаларни бажаришга тайёр. Кадрлар тайёрлаш бўйича чора-тадбирлар кўришда кўрсатган ёрдамингиз учун шахсан сизга миннатдорчилик билдирмоқчиман», — деди Лукашенко россиялик офицернинг ҳисоботини тинглагандан кейин.
Президент россиялик аскарларнинг Беларусдалиги мамлакат учун ҳам фойдали экани, улар тажриба алмашишда ёрдам беришини айтди. Беларусь президенти аскар ва офицерлар билан суҳбатлашиб, бўлинмалар жойлашган жой билан танишди. Россиялик аскарларга алоҳида биринчи тиббий ёрдам тўпламлари тарқатилди, Лукашенко улар анча қулай эканини таъкидлади.
Мавзуга доир:
Изоҳ (0)