Шаҳзода Гарри рафиқаси Меган Маркл туфайли ўз акаси, Уэльс шаҳзодаси Уильям билан муштлашиб қолгани, акаси унга ташлангани ҳақида гапириб берди. Бу воқеа Сассекс герцогининг Spare («Захирадаги») автобиографик китобидан ўрин олди, у 10 январда нашрдан чиқади. Мемуардан олинган парчаларни китобнинг нусхасини қўлга киритган The Guardian томонидан эълон қилинди.
Шаҳзодалар ўртасидаги келишмовчилик 2019 йилда Ноттингем коттежида юз берган, у ерда ўша вақтда Гарри ва Меган истиқомат қиларди. Китобда айтилишича, шаҳзода Уильям ўзаро муносабатларидаги фалокатни ва жуфтликнинг матбуот билан курашини муҳокама қилиш учун дарғазаб ҳолатда келган.
Уильям Мегандан шикоят қилган, уни «оғир табиатли, қўпол ва кескин» деб атаган. Бунга жавобан Гарри акаси матбуотда рафиқаси ҳақида айтилган гапларни такрорлаётганини билдирган. Охир-оқибат, уларнинг баҳси муштлашувга айланиб кетган.
«Ҳаммаси жуда тез юз берди. У менинг ёқамдан тутиб, ерга йиқитди. Мен итнинг косаси устига йиқилдим, у синиб кетди ва бўлаклари танамга санчилди. Бироз вақт эсанкираб шу аҳволда ётдим, кейин эса туриб, унга туёғини шиқиллатишини айтдим», — деб ёзади шаҳзода ўз мемуарларида.
Шундан кейин Уильям Гарридан худди болаликдаги каби қайтариб уришни талаб қилган, аммо у бош тортган. Акаси кетган, сўнг қайтиб келиб, кечирим сўраган. Кейинроқ Гаррига бўлган воқеа ҳақида Меганга айтмасликни маслаҳат берган.
Шаҳзода рафиқаси унинг юзидаги жароҳатларни кўрганидан кейин акаси билан муштлашганини айтган. У кўп ҳам ҳайрон қолмаган ва жаҳли чиқмаган, шунчаки «жуда хафа бўлган», дейилади мемуарларда.
2020 йилда шаҳзода Гарри ва унинг рафиқаси Меган Маркл қироллик ваколатларидан воз кечишини эълон қилди. Улар Британия қироллик оиласига расман вакиллик қилишдан ва давлат томонидан молиялаштирилишдан тўхтади. Шундан кейин эр-хотин аввал Канадага, сўнг АҚШга кўчиб ўтди.
2022 йил декабрида Netflix жуфтликнинг ҳаёти ҳақидаги «Гарри ва Меган» ҳужжатли сериалини чиқарди. Мини-сериалда герцог ва герцогиня ўз муносабатлари тарихи ва Британия қироллик оиласидан узоқлашиш ҳақидаги қарорлари ҳақида гапириб берган.
Изоҳ (0)