Тайван TASA космик агентлигининг сунъий йўлдош интернет технологиялари соҳасидаги лойиҳасини амалга ошириш бўйича маҳаллий ва халқаро инвесторлар билан музокаралар олиб бормоқда, деб хабар берди Financial Times (FT) манбалари. Уларнинг сўзларига кўра, орол расмийлари Украинадаги воқеалардан илҳомланиб, SpaceX’нинг Starlink сунъий йўлдош тизими аналогини яратишни режалаштирмоқда.
«Биз қуйи Ер орбитасидаги сунъий йўлдош алоқа лойиҳамизни компанияга айлантирмоқчимиз», — дея TASA вакилининг сўзларидан иқтибос келтирди FT. Тайваннинг рақамли технологиялар вазири Одри Таннинг таъкидлашича, мамлакат раҳбарияти Украинада Starlink’дан фойдаланиш амалиётини муваффақиятли деб ҳисоблайди, чунки «кенг кўламли офат пайтида» ҳам украиналик расмийлар ва журналистлар интернетга уланиш имконига эга бўлмоқда.
Хусусан, Тайван лойиҳани молиялаштириш учун SpaceX ва Tesla билан ишлаган Америка венчур фонди Draper Associates’га учун мурожаат қилди. Draper вакиллари вазиятга изоҳ беришдан бош тортди.
Тан хоним сунъий йўлдош тизимини ишга тушириш «бир неча йил» вақт олишини айтди. У «ижтимоий барқарорликни» таъминлашни лойиҳанинг асосий мақсади деб атади.
2022 йил февралидан бери Украина 22 мингга яқин Starlink антенналарини олди. 20 декабрь куни Украинанинг рақамли трансформациялар вазири Михаил Федоров SpaceX яқин келажакда мамлакатга яна 10 000 дан ортиқ Starlink терминалларини етказиб беришини маълум қилди.
Тайван ва Хитой ўртасидаги муносабатларнинг кескинлашуви 2022 йилнинг ўрталаридан бошлаб кузатилмоқда: 26 декабрь куни Тайван Мудофаа вазирлиги мамлакат ҳаво мудофаа зонаси Хитой ҳарбий самолётлари томонидан энг катта кўламда бузилгани ҳақида хабар берди. Аввалроқ Хитой раҳбари Си Цзиньпин АҚШ президенти Жо Байденга Тайван масаласи Хитой—АҚШ муносабатларидаги «қизил чизиқ» эканини айтганди.
Изоҳ (0)