Тошкент шаҳри Сергели туманида икки нафар фуқаро «Фатзорб» номли препаратни оздирувчи дори деб сотаётгани аниқланди. Бу ҳақда пойтахт ИИББ хабар берди.
Қайд этилишича, сўнгги вақтларда ижтимоий тармоқларда оздирувчи маҳсулот сифатида «Фатзорб» номли дори воситаси сотилмоқда. Ушбу дори таркибида сибутрамин мавжуд бўлиб, у кучли таъсир қилувчи модда ҳисобланади.
5 январь куни Сергели тумани Обиҳаёт кўчасида 1992 йилда туғилган Д.С. ва 1993 йилда туғилган К.С. 600 минг сўм эвазига 180 дона «Фатзорб»ни сотаётган вақтида ушланган. Шунингдек, К.С. бошқарувидаги машина текширилганда яна 72 дона дори аниқланган ва ашёвий далил сифатида олинган.
Ҳозирда мазкур ҳолат юзасидан терговга қадар текширув ўтказилмоқда. Текширув якуни бўйича қонуний қарор қабул қилиниши таъминланади.
«Ҳурматли фуқаролар. Ҳар қандай дори воситасини сотиб олишдан ва уни истеъмол қилишдан аввал шифокорлар билан маслаҳатлашинг», — дейилади хабарда.
Изоҳ (0)