NASA раҳбари Билл Нелсон Хитой Ой дастури юзасидан хавотир билдирди. The Politico нашрига берган интервьюсида у Хитой Ойнинг ресурсларга энг бой бўлган ҳудудларини эгаллаб олиб, АҚШни у ерларга яқин йўлатмаслиги мумкинлигини айтди.
«Бу факт: биз космик пойгада қатнашяпмиз. Улар илмий тадқиқотлар баҳонаси билан Ойдаги жойларни эгаллаб олмаслигига кўз-қулоқ бўлиб туришимиз керак. Кейинроқ улар ‘Нарироқ туринглар, бу жой бизнинг ҳудудимиз’ — дейиши ҳам мумкин», — деди Нелсон.
NASA раҳбари фикрича, АҚШ ва Хитой ўртасидаги Ой пойгаси тобора кескин тус олмоқда, келаси икки йил эса унда ким ғолиб чиқишини аниқлаб бериши мумкин. Бундан ташқари, у Хитой томонидан коинотни ўзлаштиришда эришилган «улкан ютуқлар»ни қайд этди ва «улар Ойга бориб қўнадиган сана тобора яқинлашиб келаётгани»ни қўшиб қўйди.
«Фазо — жанг қиладиган майдон эмас. Коинотни тинч мақсадларда тадқиқ қилиш ва қўллаш — инсоният учун умумий иш ва у ҳаммага фойда келтириши керак. Хитой доим фазодан тинч йўл билан фойдаланиш тарафдори бўлиб келган, коинотда қуролланиш пойгасига қарши бўлиб келмоқда», — деди Хитой элчихонаси вакили.
АҚШ жорий ўн йиллик мобайнида Ойга одам туширишни кўзламоқда. 2022 йил ноябрида NASA «Артемида» дастури доирасида Orion космик кемасини учирди, у ўз миссияси чоғида икки марта Ойни айланиб учди. Парвоз мақсади кемани текшириб кўриш билан бирга, бундай парвоз давомида одамлар қандай таъсирга учраши ҳақида маълумот йиғишдан иборат эди. 11 декабрь куни космик кема капсуласи Тинч океанига муваффақиятли қўнди. «Артемида II»ни учириш 2025—2026 йилларга мўлжалланган. Ушбу парвоз доирасида NASA астронавтларни Ой орбитасига олиб чиқишни режалаштирмоқда.
Аввалроқ NASA вакили 2030 йилга келиб, астронавтлар Ойда яшайдиган ва ишлайдиган бўлишини маълум қилган эди. Говард Хунинг айтишича, NASA Orion кемаси ёрдамида одамларни Ойга тушириш имконини берувчи узоқ муддатли дастур ишлаб чиқмоқда. Унинг сўзларига кўра, агар «Артемида»нинг жорий парвози муваффақиятли кечса, унда кейинги парвоз экипаж иштирокида бўлади. Ундан кейин эса учинчи парвоз уюштирилиб, унинг доирасида астронавтлар бундан 50 йил аввал — 1972 йил декабрида «Аполлон-17» кемаси парвозидан кейин биринчи марта яна Ойга қўнади.
Изоҳ (0)