Украина Қуролли кучлари бош қўмондони Валерий Залужний 2022 йил якунларини келтириб ўтди. Унинг маълум қилишича, Украина уруш бошланганидан буён ўтган ўн ой ичида ўзининг Россия томонидан тўлиқ кўламли истило бошланишидан олдин ва кейин босиб олинган ҳудудлари, яъни, шу жумладан, Қрим ҳамда ДХР ва ЛХР ҳудудларининг 28 фоизини озод этишга муваффақ бўлган.
Залужний келтириб ўтган маълумотларга кўра, сўнгги ойларда УҚК Украинанинг қарийб 40 минг квадрат метр ҳудудини озод қилган — бу Россия 2022 йил 24 февралдан кейин эгаллаб олган майдонларнинг тахминан 40 фоизи демакдир. Айни пайтда қуруқликдаги фронт чизиғи қарийб 4 минг километрга чўзилган, фаол жанговар ҳаракатлар эса 1500 километрлик майдонда бўлиб ўтмоқда.
Бундан ташқари, бош қўмондон қайд этишича, УҚК уруш мобайнида 600 мингдан ортиқ тинч аҳолини жанговар ҳаракатлар зонасидан эвакуация қилишга, шунингдек, икки миллион тонна гуманитар юкларни етказиб берилиши ва тақсимланишини амалга оширишга муваффақ бўлган.
Шунингдек, Залужнийнинг хабарида айтилишича, бир йил ичида УҚК 1300 гектардан ортиқ ҳудудларни портловчи предметлардан тозалаган ҳамда 41 мингта портлаш хавфи бўлган нарсаларни йўқ қилган.
Ёз охири — куз бошида УКҚ ҳужумга ўтди, натижада улар Россия томонидан 24 февралдан кейин эгаллаб олинган катта-катта ҳудудларни озод этишга муваффақ бўлди. Хусусан, сентябрь ўрталарига келиб, УҚК Харьков вилоятини деярли тўлиқ озод этди, ноябрда эса Украина ҳарбийлари Херсон шаҳрига кирди.
Изоҳ (0)