АҚШ президенти Жо Байден Жанубий Корея ҳукумати билан қўшма ядровий машғулотларни муҳокама қилмаётганини айтди. Аввалроқ Жанубий Корея президенти Юн Сок Ёл АҚШ билан ядровий кучларни жалб қилган ҳолда қўшма машғулотларни ўтказиш ҳақида музокаралар олиб борилаётганини айтган эди.
Жанубий Корея ҳукумати билан қўшма машғулотлар масаласини муҳокама қилган-қилмагани ҳақидаги саволга жавоб бераётиб, у: «Йўқ», — деди.
Юн Сок Ёл Chosun Ilbo газетасига берган интервьюсида Сеул ва Вашингтон Америка ядровий қуроллари иштирокида қўшма машғулотлар ўтказиш имкониятини муҳокама қилаётганини айтганди.
«Ядро қуроллари АҚШга тегишли бўлса-да, разведка маълумотларини алмашиш, режалаштириш ва машғулотлар биргаликда амалга оширилиши керак»,— деди у ва АҚШнинг бу ташаббусга ижобий муносабатда эканини таъкидлади. Машғулотлар Жанубий Кореяга Шимолий Кореядан келадиган ядровий таҳдидга тайёрланишда ёрдам бериши кутилмоқда.
Август ўрталарида Юн Сок Ёл КХДРга ядросизланиш эвазига иқтисодий кўмак таклиф қилганди. Бироқ Шимолий Корея ҳукумати бу таклифни рад этди. Россиянинг КХДРдаги элчиси АҚШ ва Жанубий Корея ҳарбий машғулотлари Шимолий Корея ядровий кучлари сафарбар этилишига олиб келиши мумкинлигини тахмин қилди.
31 декабрь куни КХДР Меҳнат партияси ялпи мажлисида Ким Чен Ин мамлакат ядровий арсеналини кучайтириш зарурияти ошганини, чунки Жанубий Корея «шак-шубҳасиз душман»га айланганини маълум қилди. Унинг баёнотига жавобан Жанубий Корея ядровий зарба амалга оширилган тақдирда, Ким Чен Ин режимига нуқта қўйилиши ҳақида огоҳлантирди.
Изоҳ (0)