Кўпинча машҳур инсонлар ҳаёти давомида ҳеч қандай қийинчилик кўрмагандек тасаввур уйғотади. Бироқ машҳурлик ҳамда муваффақиятга осонлик билан эришиб бўлмайди. Тақдир тақозоси билан гоҳида мусофирликни ҳам бошдан кечиришга тўғри келади. Қуйида хорижий мамлакатларда турли қора ишларни қилиб, тирикчилик учун пул ишлаган машҳурлар ҳақида сўз юритилади.
Ҳамдам Собиров
«Қора атиргул», «Мактабимда» ва «Тентакчам» каби қўшиқлари билан омма эътиборига тушган, ҳозирги кунда YouTube’да клиплари энг кўп томоша қилинаётган хонанда Ҳамдам Собиров ижодни бошламасидан аввал Россияга муҳожир сифатида борган. Чунки оиласининг моддий аҳволи у қадар яхши эмасди.
— Меҳнатнинг айби йўқ. Мен ҳам бир ярим йилга яқин қурилиш ишларида ишлаганман. Муҳожир бўлиб яшаш қийин. Аввалига маошимни вақтида беришган, икки-уч ойдан кейин ‘ўйинлар’ бошланган. Иш берувчилар пул беришни пайсалга солгандан кейин Ўзбекистонга қайтишга қарор қилганман, — дейди Ҳамдам Собиров.
Алихан
«Қилмаган ишим қолмаган, тўғриси. Бир хил одамларга ўхшаб виллада яшаяпман ёки мана бу менинг виллам деб, Mercedes’нинг олдида расмга тушиб, пафос ясагим келмайди. Тўғрисини айтсам, пол артишдан тортиб идиш ювишгача қилмаган ишим қолмаган. Биринчидан, у ерда талабаман. Эрталабдан кечгача ишлашга ҳақимиз йўқ, ҳуқуқимиз ҳам. Бу дегани ҳар қандай иш сизни қучоқ очиб кутиб олмайди. Ҳам тилни билмайман.
Тил ўрганишга энди қадам босганман. Қисқа қилиб айтадиган бўлсам, ресторан ёки McDonald’s каби фастфудларда идиш-товоқ ювишдан бошлаб, секин-секин гамбургер тайёрлашга, ундан кейин етказиб бериш хизматига ўтиб, шу тарзда нолдан бошлаганман. Америкага бордингиз, тил билмайсиз ва пул йўқ. 10 йил ичида анча ишларда ишлаб чиқдим. Green Card ҳам беришди. Тўғрисини айтсам, қилмаган ишим қолмади. Тошкентга келганимдан кейин уйланиб, ота-она, оила ва фарзандлар олдида қолдим», – дейди актёр.
Фаррух Фазел
Rolex Gucci ва «Бор ана» каби қўшиқлари билан тингловчиларга яхши таниш бўлган Фаррух Фазел Тошкент вилоятининг Чирчиқ шаҳрида таваллуд топган. Унинг юлдузларга бой клипларини кўрганлар бойнинг боласи деб ўйлашади. Аммо хонанда камтарона, ишчилар оиласида таваллуд топган. «Мен эмас, продюсерим бой», дейди ёш хонанда. Унинг продюсери шоумен Даврон Кабулов ҳисобланади.
— 2012 йилдан муҳожирлик кунларим бошланган. Мен яқинларимнинг қаршилигига қарамай Россияга ишлагани кетганман. Ниятим ҳаётимни ўзгартириш ва у ерда институтга кириш эди. Муҳожирликнинг илк йили қурилишда ишлаганман. Ғишт ташиган куним қўлларим ёрилиб кетарди. Кейинчалик ишга ўрганиб кетдим. Сувоқчилик ишларини ҳам ўзлаштирдим. Бир ярим йил қурилишда ишлаб, ўқишга учун пул тўпладим. У ерда ишлаш осон эмас, муҳожирликда пул топаётган инсонларнинг дардини жуда яхши тушунаман.
Жалолиддин Аҳмадалиев
«Ёр биздан кетди», «Менда қолмади дил» ва «Эҳ жўралар» қўшиғи билан интернет юлдузига айланган Жалолиддин Аҳмадалиев ҳам кўплаб қийинчиликларни бошдан кечирган. У мактабни битирган йили Россияга кетиб, ишлашга мажбур бўлган.
— Мактабни тамомлаб, акаларим билан Россияга ишлашга кетганман. Ўшанда 18 ёшда эдим. У ерда қурилиш, машина ювиш шохобчасида ишладим. Ундан кейин Ўзбекистонга қайтиб, яна шу иш билан шуғулландим. Кейин дадамнинг талаби сабаб косибга шогирдликка тушдим. Икки йил косибчилик қилдим. Аммо заҳарли елим сабаб ошқозоним қаттиқ оғрийдиган бўлиб қолди. Аввалдан хонандаларга қўшиқлар ёзиб берганман, ҳозир ҳам илтимос қилганларга рад жавобини беролмайман. Интернетдаги машҳурлик — ҳаммаси Аллоҳдан. Бир пайтлар орзу қилган ижодкорларим билан бир саҳнада эканлигимга ва ўз тингловчиларим борлигига шукр қиламан, — дейди Жалолиддин Аҳмадалиев.
Соҳиб Аббосхон
«Занжир», «Наҳотки сен», «Ажал сўқмоғи» каби бир қанча фильм ва сериаллардаги бош роллари билан машҳурликка эришган актёр ва режиссёр Соҳиб Аббосхон ҳам АҚШда яшайди. У муҳожирликнинг илк йили писса ташувчи, сувоқчи ва такси ҳайдовчиси бўлиб ишлаган. Айни кунларда эса ўзбекистонлик тадбиркорлар билан ҳамкорлик қилади.
— Муҳожирлик осон эмас, айниқса, тил билмаслар жуда қийналади. Тил билган одам учун ҳаммаси осон кечади, деб ҳам айтолмайман. Хорижда сабр билан яшаш ва қийинчиликлардан қўрқмаслик керак. Мен АҚШга биринчи келганимда меҳмонхонада сувоқчи бўлиб ишлаганман. Бу иш билан 45 кун шуғулланганман.
Қизимнинг мактабидагилари унга даданг Америкада меҳмонхона тозалаб юрибди, деб гапирган экан. Бу ерда ишлаган ўзбеклар уларга шундай дейишган бўлса керак. Ўша куни ўша гапни эшитиб йиғлаганман. Кеча обрў-эътиборда, кино олиб юрган эдим, бугун бундай аҳволдаман деб йиғлаганман. Лекин олдимга қўйган мақсадларим бу қийинчиликлардан устун келган, — дейди Соҳиб Аббосхон.
У 2017 йилдан буён АҚШда яшайди. 2020 йилда қизини турмушга берди, аммо тўйда ўзи иштирок этолмади.
Беҳзод Муҳаммадкаримов
Ўзбекистонда хизмат кўрсатган артист Беҳзод Муҳаммадкаримов «Шайтанат», «Амир Темур», «Ўткан кунлар», «Паризод», «Оқ бино оқшомлари» ва «Буюк Турон» каби фильмларда турли даражадаги ролларни ижро этган. У машҳур актёр бўлишига қарамай муҳожирлик азобини тортган.
— Мен Америкада қора ишларни қилганимни яширмайман. Ишни меҳмонхонада чойшаб ва ёстиқларни ташишдан бошладим. Кейин магазинда полларни тозалаб, лаклайдиган ишга кирдим. Асосан, кечқурун ишлардим. Бу ҳам етмагандек кундузи ҳам иш олардик, кундузи топганимизга Америкада яшардик, кечқурун ишлаган пулимизни Тошкентга — уйга юборардим.Кечаси билан ишлаб, кундузи яна пешингача ишлардим.
Ҳар куни шундай: дам олиш кунларисиз ишлардим. Тўғрисини айтсам, фақат кечқурун ишлаганимиз учун йиллаб қуёшни кўрмаган вақтларим бўлди. Ресторанда идиш-товоқ ювдим, официантлик қилдим, писса ташидим, қурилишда ишладим, юк ташувчи бўлиб, уй кўчирдим. Ҳаттоки музқаймоқ чиқарадиган цехда ишлаб, музқаймоқ ҳам тайёрладим. Бир йигитга қирқ ҳунар оз, деган мақолни амалда ўзимда кўрдим ва исботладим, — дейди Беҳзод Муҳаммадкаримов.
СанЖай
Хонанда СанЖай она шаҳри Навоийдаги заводда оддий ишчи бўлган, аммо санъатга қизиқиши сабаб дижейлик ҳам қилган. Кейинчалик Москвага, ундан сўнг Чеченистонга бориб ишлаган.
— Москвада тунги клубда дижейлик қилганман, маошим зўр эди. Чеченистон раҳбарига атаб қўшиқ ёзганман ва уни Рамзан Қолдировга кўрсатиш учун Чеченистонга борганман. У ерда мусофирлик қанчалик қийин бўлишини билгандим. Бир ҳафталарда Москвага қайтаман, деб ўйлагандим. Афсуски, Қодиров билан учрашишим осон кечмаган. Менга ҳеч ким ишонмган, десам ҳам бўлади. Қишлоқларга қатнайдиган такси ҳайдовчилари билан танишгандим.
Йўловчилар келгунича машинасига ўтириб, дам олардим. Жуда қийналганман, муқим ётар жойим бўлмагани учун ўтирган еримда ҳам ухлаб қолаверардим. Аммо бир ой деганда Рамзан Қодиров билан учрашганман ва Устозлар куни муносабати билан ўтказиладиган давлат тадбирида иштирок этганман, — дейди хонанда СанЖай.
Зарнигор Ғаниева
«Журналист», «Севги» каби сериаллардаги образлари ва Гулсанам Мамазоитова билан куйлаган «Иккинчи аёл» дуэти билан томошабинларга яхши таниш бўлган Зарнигор Ғаниева ҳам бир муддат Жанубий Кореяда яшаган. Актрисанинг ҳозирда ҳам у ерда уйи бор.
Биздаги маълумотларга қараганда, Зарнигор Жанубий Кореяга борган илк йилларида қарияларни парваришлаш хизматида фаолият юритган. Кейинчалик тилни ўрганиб, тадбиркорлик билан шуғулланган. Аввалига у ердаги кичик турдаги маҳсулотларни Ўзбекистонга импорт қилган. Тилла тақинчоқлар савдоси билан шуғулланганини ҳам яширмайди.
Мавзуга доир:
- Шукурулло Исроилов — «морг»да, Севара Назархон — «Ипподром»да. Машҳур бўлишидан аввал ўзини турли соҳаларда синаб кўрган ўзбекистонлик санъаткорлар (видео)
- АҚШга кўчиб кетган ўзбекистонлик машҳурлар (фото)
- Соҳиб Аббосхон АҚШда меҳмонхонада сувоқчилик қилгани ва қизининг сўзлари уни йиғлатгани ҳақида гапирди (видео)
- Даврон Кабулов кашф этган истеъдод Фарруҳ Фазел — бойнинг боласи эмаслиги, Россияда муҳожир бўлгани ва ижодидаги сокинлик сабаби ҳақида
Изоҳ (0)