Россия, Вьетнам ва Куба дипломатлари Шимолий Корея етакчиси Ким Чен Инни яқинлашиб келаётган Янги йил билан табриклаб, унга бир саватдан гул жўнатишди. Бу ҳақда Корея Марказий телеграф агентлиги хабар берди.
«Ҳурматли Ким Чен Инга 29 декабрь куни Россия дипломатик корпуси ходимлари, Кубанинг фавқулодда ва мухтор элчиси ҳамда Вьетнам элчихонаси ҳарбий атташеси номидан саватчада гуллар ва табрик мактублари топширилди», — дейилади хабарда.
Аввалроқ Миср президенти Абдулфаттоҳ ас-Сиси ва Фаластин президенти Маҳмуд Аббос Ким Чен Инни яқинлашиб келаётган Янги йил билан табриклаган эди. Ас-Сиси Шимолий Корея раҳбарига телеграмма йўллаб, унда 2023 йил «бутун дунё халқлари учун фаровонлик йили бўлишини» тилаган.
«Янги йилда икки томонлама муносабатларни янада мустаҳкамлаш учун кучли чоралар кўрилишини тилайман», — деб ёзган ас-Сиси КХДР халқига «ёрқин келажак» тилаб.
Аббос ҳам дипломатлар сингари Ким Чен Инга гул юборган.
Шимолий Кореянинг ўзига хос йил ҳисоблаш тартиби бор, у КХДР асосчиси Ким Ир Сеннинг туғилган йилидан (1912) бошланади.
Изоҳ (0)