Россияда қисман сафарбарлик пайтида кўплаб муаммолар бўлган, шунга қарамай, жараён якунланган. Бу ҳақда Россия мудофаа вазири Сергей Шойгу Украинадаги «махсус ҳарбий операция» бўйича мувофиқлаштирувчи гуруҳнинг биринчи йиғилишида айтиб ўтди.
«Биласиз, қисман сафарбарликни якунлаганмиз, биз уни амалга оширдик, кўп қийинчилик ва муаммолар бўлди», — деди Шойгу.
Вазирнинг сўзларига кўра, сафарбарлик билан боғлиқ аксар муаммо ва масалалар тезда ҳал этилган. Шойгу Мудофаа вазирлиги фуқаролардан ҳеч қандай маълумотни яширмасликка ҳаракат қилганини таъкидлади.
«Муаммо бор, уни ҳал қилиш керак. Бунинг учун мен кўпчиликка раҳмат айтаман», — деди Шойгу.
21 декабрь куни Россия президенти Владимир Путин қисман сафарбарлик шароитида ҳарбий рўйхатга олиш ва қабул қилиш бўлимлари тизимини модернизация қилишни буюрди. Давлат раҳбари Россиядаги сафарбарлик чоғида муайян муаммолар аниқланганини таъкидлади. Бундан ташқари, Путин бўлинмаларни жойлаштириш учун қурол ва моддий ресурсларни тўплаш ва сақлаш тизимини такомиллаштириш муҳимлигини таъкидлади.
Россияда қисман сафарбарлик 21 сентябрь куни эълон қилинганди. 28 октябрь куни мудофаа вазири Сергей Шойгу сафарбарлик якунлангани ва берилган барча топшириқлар бажарилгани ҳақида ҳисобот берди. Шу билан бирга Путин сафарбарлик якунлангани ҳақида расмий ҳужжат имзоламаган.
Изоҳ (0)