Жанубий Корея Қуролли кучлари қўмондонлиги КХДР учувчисиз учар қурилмалари мамлакат президенти офиси жойлашган ҳудудга яқинлашгани ҳақидаги хабарларни рад этди, деб ёзади Yonhap.
Аввалроқ мухолифатчи «Тобуро» демократик партияси депутати Ким Бён Чжу Шимолий Корея дрони Сеулда Жанубий Корея президенти Юн Сок Ёлнинг офисидан тахминан 3,7 км масофада жойлашган парвоз тақиқланган П-73 зонасига бостириб кирганини маълум қилганди.
«Бу мутлақо ҳақиқатга тўғри келмайди, — деди Корея Республикаси Штаб бошлиқлари қўмитаси вакили Ли Сон Чон. — Бундай нотўғри ва асоссиз баёнотлар берилаётганидан жуда афсусдамиз».
26 декабрь куни Кенгидо провинциясининг чегара ҳудудида КХДРнинг бешта дрони аниқланган, шундан кейин Жанубий Корея огоҳлантирувчи хабарлар тарқатган, қирувчилар, вертолётлар ва ҳаво ҳужумига қарши мудофаа воситалари тревога бўйича ҳавога кўтарилди. Республика ўз учувчисиз учар қурилмаларини чегара яқинидаги туманларга йўналтирди.
Жанубий Корея ҳарбийлари КХДР дронларини уриб тушириш учун қарийб юз марта ўт очди. Эни 2 метрдан ортиқ бўлмаган дронларни бундай ўқлар билан уриб тушира олишмаган. Бешта дрондан биттаси Сеул осмонидан учиб ўтган, қолганлари Жанубий Корея ғарбидаги Канхвадо ороли яқинига борган. У демаркация чизиғи яқинида, Сеул эса ундан тахминан 50 км нарида жойлашган. Кейинроқ учар қурилмалар Жанубий Корея ҳарбийлари мониторинг зонасидан ғойиб бўлган.
Шундан сўнг Жанубий Корея ҳарбийлари Шимолий Корея дронларини йўқ қилиш бўйича операция муваффақиятсиз ўтгани учун омма олдида узр сўради.
Жанубий Корея президенти Юн Сок Ёл эса Шимолий Кореядан келган дронларнинг ҳар бирига КХДР билан чегара орқали икки ёки учта учувчисиз учоқ юбориш билан жавоб қайтаришни буюрди.
Изоҳ (0)