23 декабрь куни кечқурун Россиянинг Кемерово шаҳрида ноқонуний қариялар уйи ёниб кетди. Ёнғин оқибатида 20 киши ҳалок бўлди. Бу ҳақда Россия Фавқулодда вазиятлар вазирлиги хабар бермоқда. Яна олти киши жабрланди, уларнинг икки нафари оғир аҳволда касалхонага ётқизилган.
«Таврическая кўчасида хусусий уй ёниб кетди. У кеча-ю кундуз кекса кишиларни сақлаш учун ноқонуний равишда фойдаланилгани аниқланди. Ҳеч қанақа ўт ўчириш тизимлари у ерда кўзда тутилмаган», — дея маълум қилди фавқулодда хизматлар ходими.
Ёнғин майдони 180 квадрат метрни ташкил қилган. Россия ОАВларига кўра, ёнғиннинг дастлабки сабаби носоз иситиш мосламаси ёки тунда ўчирилмасдан қолиб кетган ўчоқ деб тахмин қилинмоқда.
Кемерово вилояти прокуратураси ҳодиса юзасидан текширув бошлади.
Изоҳ (0)