Россия Ташқи ишлар вазирлигининг учинчи департаменти раҳбари Александр Стерник Москванинг Марказий Осиёдаги шерикларига нисбатан сиёсатининг асоси «стратегик сабр-тоқат»дан иборат эканини ва «амалий ҳаракатлар» шунга асосланишини маълум қилди. Бу ҳақда у ушбу минтақа мамлакатларининг «муҳмал» ҳаракатларига, масалан, Россияга қарши санкцияларга амал қилишига қандай муносабат кўрсатиши ҳақидаги саволга жавоб бераётиб айтиб ўтди.
«Биз барча ўйинчиларнинг хатти-ҳаракатларини аввало Россия манфаатларига зарар бериш ёки бермаслиги нуқтаи назаридан баҳолаймиз, — деди Стерник. — Ва бундан тегишли хулосалар чиқарамиз, шу жумладан, Россия Федерацияси билан бу кўп тармоқли алоқаларни йўқотмасликдан жуда манфаатдор бўлган шериклар билан биргаликда. Алоқаларни тўхтатишга қилинган кичик ишора ҳам шунчалик катта иқтисодий харажатларга олиб келиши мумкинки, уларни хўжайинлар (ғарблик ўйинчилар назарда тутилмоқда) томонидан компенсация ҳақидаги ҳеч қандай ваъдалар қоплай олмайди».
Ўз нутқи чоғида Александр Стерник Россия иштирокидаги халқаро ташкилотларда, хусусан, Евросиё иқтисодий иттифоқи ва Коллектив хавфсизлик шартномаси ташкилотида, дипломатнинг фикрича, «дунёнинг бошқа минтақаларидаги бирлашмаларга хос бўлган» «калтаклаш йўли билан интизом ўрнатиш» йўқлигини айтди.
«Агар А мамлакатининг позицияси Б мамлакатининг позицияси билан мос келмаётганини кўрсак, биз А ёки Бнинг тарафини олмасдан, яхшиси, модератор позициясини эгаллаймиз», — деди дипломат ва бундай тамойил Кавказортида ҳам, Марказий Осиёда ҳам қўлланилганини эслатиб.
Дипломат, шунингдек, минтақа мамлакатларининг янги транспорт йўлакларини, масалан, Каспий денгизи орқали бундай йўлакларни ишга тушириш ташаббусларига хотиржам қарашини таъкидлади. «Жаҳон бозорларига чиқишнинг янги йўлларини қидириш — ҳар қандай мамлакатнинг суверен ҳуқуқи», — деди у.
Стерник «Валдай» халқаро мунозара клуби доирасида «Марказий Осиё ва Украина инқирози» конференциясида қатнашди.
Марказий Осиё мамлакатлари учун 2022 йилги воқеалар оқибатлари ҳақидаги маърузанинг бош муаллифи, постсовет маконида жамоатчилик-сиёсий жараёнларни ўрганиш бўйича ахборот-таҳлилий марказ директори Даря Чижова ҳам Россиянинг ўз шериклари хатти-ҳаракатларига нисбатан реакцияси масаласида «қатъий тузатиш киритишга ўрин йўқлиги»ни айтди.
«Марказий Осиё мамлакатлари учун Россияга қарши санкциялар оқибатларини минималлаштириш имконияти юзага келишига сабаб шундан иборатки, бизнинг барча даражалардаги ишимиз мослашувчан эди. Бу бизнинг муносабатларимизга замон руҳига мослашиш имконини бермоқда», — деди Чижова.
Изоҳ (0)