Германия прокуратураси Федерал разведка хизмати ходимини Россия разведкасига махфий маълумотларни узатишда гумон қилиб, қўлга олди. Бу ҳақда Бош прокуратура хабар бермоқда.
ФРХ ходими Карстен Л. 16 декабрь куни ҳибсга олинган, у Россия разведкасига маълумотлар узатиб, давлатга хиёнат қилишда айбланмоқда. Гумонланувчининг уйида ва иш жойида тинтувлар ўтказилди. 22 декабрь куни суд Карстен Л.ни кейинги суд мажлисигача ҳибсга олиш ҳақида қарор чиқарди.
ФРХ раҳбари Бруно Кал Handelsblatt газетасига маълум қилишича, жосусни хизмат ходимлари ички текширув чоғида аниқлаган. Унинг айтишича, бу ишда «вазмин ва эҳтиёткор» бўлиш муҳимдир, чунки ФРХ Россия билан иш кўрмоқда, унинг «принципсизлиги ва зўравонликка мойиллиги эса муқаррардир».
Германия конституциясини ҳимоя қилиш бўйича федерал идора ва ФРХ ҳарбий операция бошланганидан кейин Россия разведкасининг жосуслик фаолияти кучайишини кутган эди, шу сабабли Украина ва Россия ўртасидаги низонинг энг бошидаёқ Германия Россия элчихонасининг ўнлаб ходимларини махсус хизматларга ишлашда гумон қилиб, мамлакатдан чиқариб юборган эди, деб ёзади нашр.
Изоҳ (0)