Украина президенти Владимир Зеленский АҚШга ташрифидан кўзланган мақсадга эриша олмади, у ҳужум операцияларини олиб бориш учун замонавийроқ қурол-яроғлар олишни режалаштирган эди. The Washington Post газетасида эълон қилинган мақолада шундай фикрлар билдирилди.
Унинг муаллифлари қайд этишича, Украина ҳарбий эҳтиёжлари борасида Жо Байден ва Зеленскийнинг қарашлари фарқ қилади. «Украина президенти ва унинг маслаҳатчилари Вашингтон Байден тақдим этишни истамаётган замонавий қурол-яроғларни юборишини талаб қилиб туриб олишда давом этмоқда», — дейилади мақолада.
Нашр фикрича, икки давлат раҳбарининг музокаралардан кўзлаган мақсадлари турлича бўлган. Хусусан, Зеленскийнинг мақсади келаси йилда «Украинанинг йирик ҳужум операцияларини бошлаш қобилиятини ошириш учун янада кучлироқ қурол-яроғ»ни қўлга киришдан иборат бўлган. «Ҳеч бўлмаганда, қисқа муддатли истиқболда у бунга эриша олганидан дарак берувчи белгилар деярли кўринмади», — деб таъкидлайди мақола муаллифлари.
Ўз навбатида, Вашингтон маъмурияти Зеленский «дипломатия ҳақида қандай фикрда экани бўйича муҳокамалар»ни сабрсизлик билан кутган, бу ҳақда газетага Оқ уйдаги манбаси маълум қилган. «У ҳозир қайси босқичда тургани, музокаралар жараёнини тезлаштириш мумкин бўлиши учун Киев максимал даражада кучли позицияда турганига ишонч ҳосил қилиш учун унга нима кераклиги — шуларни муҳокама қилишни кўзлаган», — дея қўшиб қўйди нашр манбаси.
Зеленскийнинг ўзи эса Украинага «ажойиб янгиликлар» билан қайтаётганини маълум қилди. «Бизда ажойиб янгиликлар бор… Президент Байден янги ҳарбий ёрдам пакети ҳақида эълон қилди, унинг асосий қисмини Patriot мажмуалари ташкил қилади. Бу бизнинг ҳаво ҳужумига қарши мудофаа тизимимизни аҳамиятли даражада мустаҳкамлайди», — деди у.
Шунингдек, Зеленский АҚШ Конгресси 45 миллиард долларлик ёрдам пакетини унинг таркибидан қатъий назар қўллаб-қувватлашига умид билдирди. У Украинанинг вазифаси — мамлакат инфратузилмасига нисбатан давом этаётган зарбалар фонида қишдан ўтиб олиш эканини айтди.
Байден, ўз навбатида, Вашингтон Киевни қанча керак бўлса, шунча қўллаб-қувватлашини ваъда қилди. «Сиз адолатли сулҳга эришиш ниятингизни кўрсатдингиз», — деди у Зеленскийга. Айни вақтда, Россиянинг, АҚШ президенти сўзларига кўра, жанговар ҳаракатларни тўхтатиш нияти йўқ.
Владимир Зеленский 21 декабрь куни эълон қилинмаган ташриф билан Вашингтонга келди. Ташриф доирасида Америка етакчиси билан музокаралар ўтказди, шунингдек, АҚШ Конгрессида нутқ сўзлади.
Мавзуга доир:
- АҚШ Украинага 1,85 млрд долларлик ёрдам пакети ҳақида расман эълон қилди. Унга Patriot зенит-ракеталари ҳам кирди
- «Путиннинг шафқатсиз урушига қарши биргаликдаги курашимизда сиз билан ёнма-ён туриш шарафдир». Байден — Зеленский билан учрашувда
- «Украина ҳеч қачон таслим бўлмайди. Биз ғалаба қозонамиз». Зеленский АҚШ Конгрессида нутқ сўзлади
Изоҳ (0)